Gürcüstanın Konstitusiya Məhkəməsi prezidentin ölkənin əsas qanununu pozduğunu təsdiqləyib
Tbilisi, 16 oktyabr, AZƏRTAC
Gürcüstanın Konstitusiya Məhkəməsi impiçment proseduru çərçivəsində Prezident Salome Zurabişvili tərəfindən ölkənin əsas qanununun pozulduğunu təsdiqləyib.
AZƏRTAC xəbər verir ki, Konstitusiya Məhkəməsi prezidentin impiçment təqdimatı ilə bağlı rəyini dərc edib və bu barədə məlumat Məhkəmənin saytında yerləşdirilib.
Məlumatda bildirilir ki, Gürcüstan Prezidenti 2023-cü il avqustun 31-də, sentyabrın 1-də və 6-da xaricə işgüzar səfərləri zamanı xarici əlaqələr sahəsində nümayəndəlik səlahiyyətlərini Gürcüstan hökumətinin razılığı olmadan həyata keçirib və bununla da Konstitusiyanın 52-ci maddəsinin müddəalarını pozub. Məhkəmə belə nəticəyə gəlib ki, yuxarıda qeyd olunanlar ölkənin əsas qanununun pozulması deməkdir.
Qərarı 9 hakimdən 6-sı dəstəkləyib, üç hakim isə fərqli mövqedən çıxış edib.
Qeyd edək ki, prezidentin vəzifədən uzaqlaşdırılması üçün 100 deputatın səsi tələb olunur. Bu isə o deməkdir ki, prezidentin vəzifəsindən kənarlaşdırılması üçün hakim “Gürcü Arzusu” Partiyasının üzvləri ilə yanaşı, müxalifətin də dəstəyi lazımdır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
