İQTİSADİYYAT
Güzəştli vergi tutulan ölkələrdə elektron ticarət qaydasında xidmətlərin ödənişləri vergidən azaddır
Bakı, 14 iyul, AZƏRTAC
Güzəştli vergi tutulan ölkədə onlayn qaydada keçirilən tədris proqramında iştirak məqsədilə vergi orqanında uçotda olmadan həmin ölkədə olan bank hesabına ödəniş etdikdə ödəmə mənbəyində vergi tutulurmu?
AZƏRTAC Dövlət Vergi Xidmətinə istinadla xəbər verir ki, Vergi Məcəlləsinin 2022-ci il yanvarın 1-dən qüvvəyə minmiş müddəalarına əsasən, vergi orqanında uçotda olmayan fiziki şəxslər tərəfindən elektron ticarət qaydasında xidmətlərin alışı ilə bağlı güzəştli vergi tutulan ölkələrə və ya ərazilərə ödənişlər edildikdə, həmin ödənişlər Azərbaycan mənbəyindən gəlirlərə aid edilmir.
Sözügedən qanunvericiliyə görə, vergi orqanında uçotda olmayan fiziki şəxslər tərəfindən güzəştli vergi tutulan ölkələrdə və ya ərazilərdə onlayn qaydada keçirilən tədris proqramında iştirak məqsədilə güzəştli vergi tutulan ölkələrdə və ya ərazilərdə olan hesablara ödənişlər edildikdə, həmin ödənişlərdən ödəmə mənbəyində vergilərin tutulması qanunvericilikdə nəzərdə tutulmayıb.