Haaqa meri: Yerli və regional hökumətlər tamhüquqlu idarəetmə səviyyələri kimi tanınmalıdır
Bakı, 17 may, AZƏRTAC
Qlobal çağırışlar bizi çoxtərəfli əməkdaşlığı inklüziv, çoxsəviyyəli və icraya yönəlmiş sistem kimi yenidən düşünməyə vadar edir. Çünki böhran hər yeri əhatə etmir. Elə çoxtərəfli sistem var ki, o nəinki böhrandan uzaqdır, əksinə daha da güclənir və inkişaf edir. Bu, şəhərlər və regionlar tərəfindən qurulan sistemdir, yaxınlıq, həmrəylik və inklüzivlik üzərində qurulmuş bir sistemdir.
AZƏRTAC xəbər verir ki, bunu Haaqa meri Jan Van Zanen Ümumdünya Şəhərsalma Forumunun On Üçüncü Sessiyası (WUF13) çərçivəsində keçirilən “Yenilənmiş çoxtərəfliliyi formalaşdıran yerli liderlik” mövzusunda yerli və regional hökumətlərin ümumdünya Assambleyasında çıxışı zamanı deyib.
Haaqa merinin sözlərinə görə, qlobal bələdiyyə hərəkatı göstərir ki, ərazilər arasında əməkdaşlıq həm mümkün, həm də dərin transformasiya gücünə malikdir: “Dayanıqlı İnkişaf Məqsədlərinə çatmaq üçün son illərə daxil olduğumuz və Yeni Şəhərsalma Proqramının həyata keçirilməsinin 10 illik mərhələsinə yaxınlaşdığımız bir vaxtda bütün idarəetmə səviyyələri və digər tərəflər arasında əməkdaşlığın sadəcə arzu deyil, reallıq olduğu bir gələcəyi təsəvvür etmək bizim üzərimizə düşür.
Bu reallıq yerli, regional, milli və beynəlxalq idarəetmə strukturlarına inteqrasiya olunmalıdır. Xüsusilə bu il “Yerli çoxtərəfliliyin 100 günü” təşəbbüsümüz müxtəlif gündəmləri bir araya gətirir. Bu, ortaq siyasi trayektoriyanın bir hissəsidir — daha əsaslı, daha üfüqi və daha inklüziv çoxtərəflilik trayektoriyasıdır. Biz buna “yerli çoxtərəflilik” deyirik. Bunun reallaşması üçün biz Bakıda keçirilən WUF13-də yerli və regional hökumətlərin tamhüquqlu idarəetmə səviyyələri kimi tanınması üçün çağırış edirik. Ümumdünya Assambleyasından çağırış edirik ki, yerli və regional hökumətlər həqiqi siyasi aktorlar kimi qəbul edilsinlər və qlobal idarəetməni həqiqətən dəyişdirə biləcək çərçivələri formalaşdırmaq, eləcə də öhdəliklərimizi həyata keçirmək gücünə malik tərəflər kimi dəyərləndirilsinlər”.
Bölmənin digər xəbərləri
