-Möhtərəm cənab Prezident!

Bu gün rayonumuz üçün çox əlamətdar, tarixi bir gündür.

Zati-aliləri, icazə verin, Sizin bu səfərinizi böyük sevinclə gözləyən, bu fərəhli anları yaşayan Hacıqabulun bütün əhalisi adından ilk dəfə rayonumuza gələn Prezidentimizi salamlayım, “Xoş gəlmisiniz” deyim.

Möhtərəm cənab Prezident!

Böyük minnətdarlıq və qürur hissi ilə bildiririk ki, respublikamızın hər yerində olduğu kimi, Hacıqabul rayonunun da inkişafı, əhalinin rifah halının və yaşayışının yaxşılaşması əsası ulu öndərimiz Heydər Əliyev tərəfindən qoyulmuş siyasətlə, Sizin rəhbərliyiniz altında son illər həyata keçirilən möhtəşəm tədbirlərlə, regionların sosial-iqtisadi inkişafı Dövlət Proqramının uğurlu icrası ilə bağlıdır.

Bugünkü Hacıqabulu 4-5 il bundan əvvəlki Hacıqabulla müqayisə etmək belə mümkün deyildir. İndi hər yerdə tikinti-abadlıq işləri gedir. Yeni infrastruktur yaradılır, tarlalar becərilir, təzə müəssisələr, iş yerləri açılır. İnsanların öz sabahlarına ümidləri və inamları sonsuz dərəcədə artmışdır.

Sizin Azərbaycanda həyata keçirdiyiniz siyasətin əsasında insan amili dayanır. İnsanın rifahına, onun sosial ehtiyaclarının ödənilməsinə, firavan həyatının qurulmasına yönəlmiş məqsədyönlü siyasətiniz, göstərdiyiniz yüksək qayğı və diqqət bizim rayonda da öz bəhrəsini verir. Əhalinin sosial-iqtisadi problemləri ardıcıl olaraq həll edilir. Adamların güzəranı getdikcə yaxşılaşır. Elə bu gün Sizin tapşırıq və xeyir-duanızla tikintisinə başlanan Hacıqabul Rayon Uşaq Tibb Mərkəzinin təməlqoyma mərasimində iştirakınız hacıqabullulara göstərdiyiniz qayğıya daha bir parlaq nümunədir.

Onu da qeyd etmək istəyirəm ki, buna qədər Sizin köməyinizlə rayonumuzda səhiyyə sahəsində başqa bir problem öz həllini tapmış, uzun illərdən bəri tikintisi yarımçıq qalmış 50 çarpayılıq şəhər xəstəxanası Dövlət Proqramına uyğun olaraq, cari ilin aprel ayında istifadəyə verilmişdir. Minnətdarlıq hissi ilə bildirmək istəyirəm ki, apardığınız uğurlu siyasətin nəticəsində ötən il rayon üzrə 871 min kvadratmetr mənzil sahəsi tikilib istifadəyə verilmişdir. Bu da əvvəlki illə müqayisədə 77,2 faiz çoxdur. İndi hacıqabullu ailəsinin hər bir üzvünə 14 kvadratmetr mənzil sahəsi düşür. Bu, Sizin yüksək diqqət və qayğınız sayəsində rayonda insanların yeni iş yerləri, yaxşı iş şəraiti, yüksək gəlir, firavan yaşayışla təmin olunmasının ən bariz göstəricisidir.

Hörmətli cənab Prezident!

Təkcə ötən il rayonda iqtisadiyyatın və sosial sahələrin inkişafına 11 milyon manatdan artıq investisiya qoyulmuşdur ki, bu da 2005-ci ilə nisbətən 32,1 faiz çoxdur. Sərmayənin 10,6 milyon manatı, yəni 95 faizi tikinti-quraşdırma işlərinə yönəldilmişdir. Şəhərin mərkəzində “Dədə Qorqud” parkı salınmış, dairə seçki komissiyasının binası əsaslı təmir edilmişdir. Qaz istismarı idarəsinin, sosial müdafiə mərkəzinin yeni inzibati binaları tikilmişdir. Sizin tapşırığınızla rayonumuza ayrılmış vəsait hesabına şəhərin 12 küçəsinə asfalt döşənmiş, səkilər düzəldilmiş və abadlıq-quruculuq işləri aparılmışdır.

Sizin tapşırığınız və köməyinizlə hazırda rayonda tikinti-quruculuq işləri sürətlə davam edir. Qarabağ müharibəsi əlilləri və şəhid ailələri üçün 16 mənzilli yaşayış binasının, bələdiyyə parkının tikintisi başa çatmaq üzrədir. Ayrı-ayrı sahələr üzrə özəl xidmət və istehsal müəssisələrinin tikintisi davam etdirilir.

İcazə verin, fürsətdən istifadə edərək, hacıqabulluların ən səmimi minnətdarlığını və xoş arzularını Heydər Əliyev Fondunun prezidenti, Milli Məclisin deputatı, YUNESKO və İSESKO-nun xoşməramlı səfiri çox hörmətli Mehriban xanım Əliyevaya çatdırım. Məhz Heydər Əliyev Fondunun dəstəyi ilə qısa müddət ərzində rayonda 3 yeni məktəb binası tikilmişdir. Hazırda şəhərdə 640 yerlik, Padar qəsəbəsində 420 yerlik yeni məktəb binalarının tikintisi davam etdirilir.

Hacıqabul rayonu coğrafi cəhətdən ölkənin bütün əsas kommunikasiya xətlərinin keçdiyi ərazidə və paytaxtın 110 kilometrliyində yerləşir. Bu isə rayonda sənaye sahələrinin inkişafı üçün əlverişli şərait yaradır. Uzun illərdən bəri fəaliyyətini dayandırmış toxuculuq-xalçaçılıq sahələri, süd emalı sexi rayonumuzun sənaye potensialının artırılması, işsizliyin aradan qaldırılması məqsədi ilə bərpa olunub işə salınmışdır. Nəticədə 100-dən çox sakin özünə daimi iş yeri tapmışdır. Son üç ildə rayonda 1894 iş yeri açılmışdır ki, bunun da 1735-i daimidir.

Rayonda bəzi sənaye sahələrinin inkişaf etdirilməsi üçün yaxşı şərait vardır. Toxuculuq-xalçaçılıq, meyvə-tərəvəz emalı sahələrini daha da inkişaf etdirmək, çəltik emalı zavodu tikmək üçün kifayət qədər işçi qüvvəsi və bol xammal vardır. Rayonda ildə 30 milyon ədəd yumurta istehsal edən damazlıq təsərrüfatının, müasir süd və çəltik emalı zavodlarının tikintisi nəzərdə tutulur.

Möhtərəm cənab Prezident!

Bu ərazidə yaşayanların əsas məşğuliyyəti əkinçilik və maldarlıq olmuşdur. Lakin tarixən rayonumuzda suyun çatışmazlığı çox böyük problemə çevrilmişdir. Rayonun təsərrüfatlarını əkin suyu ilə təmin etmək, bu problemi aradan qaldırmaq məqsədi ilə Sizin tapşırığınıza uyğun olaraq, artıq Pirsaat su anbarının lildən təmizlənilib həcminin genişləndirilməsinə başlanmışdır. Rayonumuzda uzunluğu 55 kilometr olan və saniyədə 6 kubmetr su ötürmək gücünə malik baş suvarma kanalının çəkilişi də sürətlə davam etdirilir. Bu işlərin başa çatması nəticəsində rayonda əlavə 6 min hektara yaxın torpaq sahəsi əkin dövriyyəsinə daxil olacaq, 7 min hektara yaxın sahənin su təminatı əsaslı surətdə yaxşılaşacaqdır.

Hacıqabullular böyük inamla düşünürlər ki, qısa müddətdə bu qədər möhtəşəm işlər həyata keçirildiyi kimi, Sizin rəhbərliyinizlə növbəti beş ildə də ölkəmizdə böyük xariqələr yaradılacaqdır. Bir neçə ildən sonra bu boz çöllər bağlı-bağatlı, yaşıllıqlar diyarına çevriləcəkdir. Siz Hacıqabula ikinci həyat gətirəcəksiniz. Belə bir xeyirxah əməli Hacıqabul camaatı heç vaxt unutmayacaq, nəsillər ömrü boyu Sizə minnətdar olacaqlar.

Möhtərəm cənab Prezident!

Sizin tapşırığınızla bağlı rayonumuzda qarşıda görüləsi işlər çoxdur. Hacıqabullular həmişə olduğu kimi, Sizin böyük diqqət və qayğınıza bundan sonra da əməli işlərlə cavab verəcək, apardığınız möhtəşəm siyasətin həyata keçirilməsinə bütün qüvvələrini səfərbər edəcəklər. 

                                                                                  X X X

Azərbaycan Prezidenti İlham Əliyev mərasimdə nitq söylədi.