HEYDƏR ƏLİYEV ADINA AZƏRBAYCAN ALİ HƏRBİ MƏKTƏBİNİN NÖVBƏTİ BURAXILIŞI OLMUŞDUR
AZƏRTAC xəbər verir ki, iyunun 28-də Heydər Əliyev adına Azərbaycan Ali Hərbi Məktəbinin növbəti, 8-ci buraxılışına həsr olunmuş mərasim keçirilmişdir.
Əvvəlcə məzunlar ümummilli lider Heydər Əliyevin ali təhsil ocağının həyətində ucaldılmış abidəsini ziyarət etmişlər.
Azərbaycanın suverenliyi və ərazi bütövlüyü uğrunda canlarından keçmiş şəhidlərin və ümummilli lider Heydər Əliyevin əziz xatirəsi bir dəqiqəlik sükutla yad olunmuşdur.
Müdafiə naziri, general-polkovnik Səfər Əbiyev Azərbaycan Ordusunun gündən-günə inkişaf etdiyini, iyunun 26-da Azadlıq meydanında keçirilən hərbi paradın bunu sübut etdiyini bildirmişdir. Nazir vurğulamışdır ki, ümummilli lider Heydər Əliyevin əsasını qoyduğu ordumuzun inkişafı ilə bağlı həyata keçirilən strategiyanı bu gün Prezident İlham Əliyev uğurla davam etdirir.
Qeyd olunmuşdur ki, ordumuzun qüdrətini daha da artıracaq bu gənc zabitlər hər an Ali Baş Komandanın əmrinə hazırdır. Onlar ermənilərin işğal etdiyi torpaqlarımızı hər an düşməndən azad etməyə qadirdir.
Gənc zabitlər ümummilli lider Heydər Əliyevin ideyalarına hər zaman sadiq qalacaqlarını, Prezident, Silahlı Qüvvələrin Ali Baş Komandanı İlham Əliyevin əmrinə hazır olduqlarını, işğal altındakı torpaqlarımızın düşməndən azad etməyə hazır olduqlarını bildirmişlər.
Müdafiə naziri Səfər Əbiyev təhsildə fərqlənən məzunlara diplomlar təqdim etmişdir.
Bölmənin digər xəbərləri
