Hindistanda gələn il çip istehsal edən zavod işə başlayacaq
Bakı, 16 oktyabr, AZƏRTAC
2024-cü ildə Hindistanın Qucarat ştatında “Micron Technology” korporasiyasının çip istehsalı üzrə zavodu işə düşəcək.
AZƏRTAC xəbər verir ki, Hindistanın kommunikasiyalar, elektronika və informasiya texnologiyaları naziri Aşvini Vayşnav bu barədə RTI agentliyinə müsahibəsində deyib.
“Bu zavod Hindistanın yarımkeçiricilər sahəsində ilk müəssisəsi olacaq. Hindistan bu sahədə dünya liderinə çevriləcək”, - deyə nazir bildirib. Onun sözlərinə görə, ölkə sənayesi diqqəti yarımkeçiricilər üçün dörd-beş komponentin istehsalına cəmləyəcək. Nəticədə həm daxili tələbat ödəniləcək, həm də bu seqmentlər digər ölkələrə tədarük olunacaq.
“Micron Technology” korporasiyasının iyunun 28-də Qucarat administrasiyası ilə imzaladığı memoranduma əsasən, ştatın hakimiyyət orqanları Sananad şəhərində çiplər üçün plastinlərin istehsal olunacağı müəssisənin inşası üçün onlara 20 faizlik imtiyaz təqdim edəcək. Korporasiya bu layihəyə 2,7 milyard dollar sərmayə qoymağı planlaşdırır.
Bundan başqa, Hindistanda Tayvanın “Foxconn” kompaniyasının yarımkeçirici istehsal edəcək iki zavodunun tikilməsi də planlaşdırılır.
Bölmənin digər xəbərləri
