Hindistanda yol-nəqliyyat hadisəsində 8 nəfər ölüb
Pekin, 28 mart, AZƏRTAC
Hindistanın şimalındakı Uttar Pradeş ştatında zəvvarları daşıyan pikapın qoşqulu nəqliyyat vasitəsinə çırpılması nəticəsində azı 8 nəfər ölüb, 20-si yaralanıb.
AZƏRTAC Hindistan mediasına istinadla xəbər verir ki, qəza ştatın paytaxtı Laknaudan təxminən 151 kilometr cənubda Kauşambi rayonunun Saini polis bölməsi ərazisindəki magistral yolda baş verib.
Məlumata görə, zəvvarlar yeni doğulmuş körpələri üçün məbəddə keçirilən mərasimdən qayıdırmışlar. Qəzadan dərhal sonra polis və xilasetmə qrupları hadisə yerinə göndərilib. Ölənlərin 5-i qadın, 3-ü uşaqdır.
Qeyd edək ki, bu ölkədə hər il yol-nəqliyyat hadisələrində orta hesabla 150 min nəfər ölür. Təkcə 2023-cü ildə avtomobil qəzalarında təxminən 10 mini uşaq olmaqla 172 mindən çox insan ölüb ki, bu da günə 74 və ya hər 3 dəqiqəyə bir ölüm deməkdir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
