Höteborqun mərkəzində aşkar edilmiş məzarlıqlar vikinqlər dövrünə aid edilib
Stokholm, 22 noyabr, Nərgiz Cəfərli, AZƏRTAC
Ötən yay Höteborqun mərkəzi hissəsində İsveç arxeoloqları kremasiya edilmiş insan qalıqları olan məzarlıq aşkar ediblər. Nəzarətsiz qalmış parkın ərazisi Şəhər muzeyinin arxeoloqları tərəfindən tədqiq edilib, çünki orada yeni stadionun tikintisi planlaşdırılır.
AZƏRTAC xəbər verir ki, son təhlillər nəticəsində aşkar edilib ki, sümük qalıqları vikinqlər dövrünə aiddir.
“Sümük qalıqları və bir qədər silisium xüsusi əhəmiyyət kəsb etmir, lakin onlar tarixi tapıntını tamamilə unikal edir”, - deyə arxeoloq Ulf Raqnesten bildirib.
Bu yaxınlarda aparılan təhlil göstərir ki, qəbirlər eramızın 750-1000 illərinə - vikinqlər dövrünə aid edilir. Bu isə tarixə tamamilə yeni baxış deməkdir.
“Çox vaxt vikinqlər dövrü adlandırılan son Dəmir dövrü tapıntıları bundan əvvəl heç vaxt Höteborqda aşkar edilməyib. Lakin indi biz bilirik ki, vikinqlər şəhərin mərkəzində yaşayıblar”, — deyə Ulf Raqnesten qeyd edir.
Gələn həftə muzeyin arxeoloqları tapıntılarını təqdim etmək üçün şəhərsalma mütəxəssisləri ilə görüşəcəklər. Tədqiqatın nəticələrinin tapıntının aşkar edildiyi rayonda tikinti işlərinə necə təsir edəcəyi hələ ki, aydın deyil.
Bölmənin digər xəbərləri
