ICESCO İslam dünyasında su təhlükəsizliyi mövzusunda forum keçirəcək
Qahirə, 24 iyul, AZƏRTAC
İyulun 27-də İslam Dünyası Təhsil, Elm və Mədəniyyət Təşkilatı (ICESCO) “Su təhlükəsizliyinin İslam dünyasında sülh və inkişafın təmin edilməsində rolu” mövzusunda virtual forum keçirəcək.
AZƏRTAC xəbər verir ki, bu tədbirin keçirilməsi gələn il Seneqalda təşkil ediləcək Dünya Su Forumuna hazırlıq məqsədi daşıyır. ICESCO-nun məlumatında bildirilir ki, tədbirdə iştirak edəcək üzv ölkələrin nümayəndələri Dakar forumuna təqdim ediləcək hesabatların xülasəsini təqdim edəcək, öz ölkələrində su təhlükəsizliyi ilə əlaqədar vəziyyətdən danışacaqlar. Foruma, həmçinin beynəlxalq təşkilatların təmsilçiləri də qatılacaq. Ekspertlər İslam ölkələrində su ehtiyatları, onlardan səmərəli istifadə və bu sahədə əməkdaşlığa dair hesabatlarla çıxış edəcəklər. Tədbir çərçivəsində ICESCO və Dakar Dünya Su Forumunun baş katibliyi arasında əməkdaşlığa dair sənəd də imzalanacaq.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
