İki böyük Körfəz ölkəsində COVID-19 yenidən sürətlə yayılır
Qahirə, 19 avqust, AZƏRTAC
Birləşmiş Ərəb Əmirliklərinin (BƏƏ) Səhiyyə naziri Əbdül Rəhman Əl Üveys ölkədə COVID-19-un yayılmasında ciddi artıma müşahidə edildiyi ilə bağlı həyəcan təbili çalıb. O, bunun səbəbini yumşalma dövründə əhalinin sosial və ailəvi şəkildə bir yerə toplaşması ilə izah edib.
AZƏRTAC xəbər verir ki, son sutka ərzində BƏƏ-də daha 365 nəfər yeni növ koronavirusa yoluxub və xəstələrin ümumi sayı 64 906-ya çatıb. Ötən gün 2 pasiyent vəfat edib, həyatını dəyişənlərin ümumi sayı isə 366-dır.
BƏƏ-nin Səhiyyə naziri qeyd edib ki, Əmirliklərdə COVID-19 əleyhinə vaksinin hazırlanması istiqamətində də işlər davam edir. O, bu sahədə inkişaf etmiş ölkələr və beynəlxalq təşkilatlarla sıx əməkdaşlığın davam etdiyini deyib.
Digər mühüm Körfəz ölkəsi - Səudiyyə Ərəbistanında da yoluxma halları artır. Krallığın Səhiyyə Nazirliyi son 24 saat ərzində 1409 nəfərin COVID-19-a yoluxduğu, 34 pasiyentin isə vəfat etdiyi barədə məlumat yayıb. Səudiyyə Ərəbistanı hökuməti yeni tədris ilinin yeddi həftəsi ərzində distant təhsilə üstünlük veriləcəyini bəyan edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
