İKİ RUSİYA TƏYYARƏSİNİN QƏZAYA UĞRAMASI PARTLAYIŞLA ƏLAQƏDARDIR
AZƏRTAC-ın müxbiri xəbər verir ki, FTX elmi-texniki təminat idarəsinin rəisi Andrey Fetisov bu barədə Moskvada jurnalistlərə məlumat verərək bildirmişdir ki, Tu-134 və Tu-154 təyyarələrinin qalıqlarının ekspertizası göstərmişdir ki, hər iki təyyarədə tərkibində heksogen olan maddə partlamışdır. A.Fetisovun sözlərinə görə, mütəxəssislər təyyarənin sərnişin kürsülərində və masalarında partlayış dalğasının əmələ gətirdiyi səciyyəvi zədələr tapmışlar. Təyyarələrin qalıqlarında qəlpə zədələri aşkar olunmamışdır. Hazırda texniki ekspertiza başa çatdırılır.
Rusiyanın nəqliyyat naziri İqor Levitinin başçılığı ilə Tu-134 və Tu-154 təyyarələrinin qəzaya uğramasının səbəblərini araşdıran xüsusi dövlət komissiyası 1-1,5 aydan sonra təhqiqata yekun vuracaqdır.
Hər iki təyyarənin qəzaya uğramasının əsas səbəbi terror aktıdır və hazırda Rusiyanın hüquq mühafizə orqanları sərnişinlərin siyahısında soyadları olan iki qadının şəxsiyyətlərini aydınlaşdırırlar.
Eyni zamanda, Rusiya hökuməti uçuşların təhlükəsizliyinin təmin olunması üçün bütün mümkün tədbirləri görmüşdür və artıq avqustun 28-dən mülki hava limanlarının nəzarət qrupunun tərkibinə DİN mütəxəssisləri də daxil edilmişlər.
