İkinci Dünya müharibəsində azərbaycanlıların xidmətlərinə həsr olunmuş tədbir keçirilib
Bakı, 21 iyun, AZƏRTAC
İyunun 21-də Beynəlxalq Mətbuat Mərkəzində “İkinci Dünya müharibəsində azərbaycanlıların rolu: Mehdi Hüseynzadə və Məmmədhüseyn Əsədov” mövzusunda tədbir keçirilib.
AZƏRTAC xəbər verir ki, tədbirdə hərbi vətənpərvərlik mövzusunda əsərlərin müəllifi kimi tanınan yazıçı Azər Hacıbəylinin Sovet İttifaqı Qəhrəmanı Mehdi Hüseynzadənin 100 illiyinə həsr etdiyi “Fədakarlıq məktəbi. Mehdi Hüseynzadə” adlı poemasının və digər əsərləri nümayiş olunub.
“Həkəri” qəzetinin baş redaktoru Rauf İlyasoğlu çıxış edərək bildirib ki, Böyük Vətən müharibəsində qələbənin qazanılmasında Azərbaycan xalqının qəhrəman övladlarının böyük rolu olub. Lakin tarix boyu məkrli ermənilər Böyük Vətən müharibəsində azərbaycanlıların göstərdikləri bu xidmətləri öz adlarına yazmağa cəhd göstəriblər.
“Alyans” Xüsusi Xidmət Veteranları Birliyinin fəxri üzvü, yazıçı-publisist, tərcüməçi Azər Hacıbəyli Sovet İttifaqı Qəhrəmanı Mehdi Hüseynzadənin keçdiyi həyat yolu haqqında geniş məlumat verib. “Mehdi Hüseynzadə haqqında bir sıra kitablar yazılıb, film çəkilib. Vətənpərvərlik mövzusunda poemalar yazmaqla, qəhrəmanların keçdiyi mübarizə yolunu xatırlatmaqla gənclərin milli ruhda tərbiyəsinə töhfə verməyə çalışıram. Bu kitabda Mehdi Hüseynzadə ilə yanaşı, digər qəhrəmanlarımız da yad olunub. Mehdi Hüseynzadənin 1941-1945-ci illərdə alman faşistlərinə qarşı apardığı çoxsaylı uğurlu kəşfiyyat əməliyyatları və nümayiş etdirdiyi hərbi şücaətləri ilə böyük şöhrət qazanaraq Azərbaycan xalqının zəngin tarixi hünər salnaməsinə şanlı səhifələr yazdığı vurğulanır”, - deyə Azər Hacıbəyli qeyd edib.
O xatırladıb ki, iyunun 22-si faşist Almaniyasının keçmiş SSRİ-yə hücum etdiyi gündür. “Fədakarlıq məktəbi. Mehdi Hüseynzadə” adlı poemada İkinci Dünya müharibəsinin müqəddəratında əhəmiyyətli hadisə olan “Tehran-43” konfransının təhlükəsizliyinin təmin edilməsində mühüm rol oynamış, bu əməliyyatın keçirilməsində və anti-Hitler koalisiyasının rəhbərlərinə qarşı sui-qəsdin və terror aktının qarşısının alınmasında şücaət göstərmiş əfsanəvi azərbaycanlı kəşfiyyatçı, sovet təhlükəsizlik orqanlarının əməkdaşı Məmmədhüseyn Əsədovun müstəsna xidmətlərindən bəhs olunur. Bu azərbaycanlı kəşfiyyatçının dünyanın xilaskarları olması barədə aşkarlanmış tarixi faktlara yer verilir. Həmçinin Mehdi Hüseynzadə ilə Məmmədhüseyn Əsədov arasında müəyyən mənəvi bağlılığın olduğu göstərilir. O vaxtlar bu sui-qəsdin qarşısının alınmasında önəmli rolu olmuş Məmmədhüseyn Əsədovun iki mükafatla - Lenin ordeni və “Qırmızı bayraq” ordeni ilə təltif edildiyi diqqətə çatdırılır.
Bildirilib ki, xalqı, dövlətçilik naminə böyük işlər görmüş, şərəf və ləyaqətlə yaşamış bir qəhrəmanımızı bu gün fəxrlə yad edirik. Həmin müharibədə xalqımızın 600 mindən çox oğlan və qızı cəbhəyə gedib, minlərlə həmvətənimiz qələbə naminə canlarından keçib. Azərbaycan əməliyyat və kəşfiyyat imkanlarını da faşizmə qarşı müharibəyə səfərbər edib. Müharibənin ən ağır illərində azərbaycanlı əsgər və zabitlər faşist ordu hissələrinə qarşı qəhrəmancasına müqavimət göstərib, eyni zamanda, onların partizan hərəkatı Qərbi və Şərqi Avropada dillər əzbərinə çevrilib. Yaxın vaxtlarda Məmmədhüseyn Əsədov haqqında oxuculara təqdim olunacaq kitabda çoxlarına bu günədək bəlli olmayan məqamlar açıqlanacaq.
Kitabın müəllifi hesab edir ki, bu məqamlar gələcəkdə Azərbaycanın milli maraqlarına uyğun şəkildə istifadə olunmalıdır. Eyni zamanda dünyanı faşizmdən xilas olunmasında müstəsna xidmətləri olan oğulları yetişdirən Azərbaycanın əzəli torpaqlarının uzun illərdir erməni işğalı altında qalmasının, dünya birliyi tərəfindən təcavüzkara qarşı kəsərli tədbirlərin görülməməsinin yolverilməz olduğunu dünyaya çatdırmalıyıq. Qoy, hamı Mehdi Hüseynzadə və Məmmədhüseyn Əsədov kimi oğullar qarşısında öz borclarını - onları insanlığa bəxş edən Azərbaycanın haqq səsinə səs verməklə, işğalçı Ermənistanı pisləməklə yerinə yetirsin.
“Erməni millətçilərinin əsas məqsədi azərbaycanlıların faşizm üzərində qələbədə rolunu kiçiltmək olub. Bu məsələni araşdırmaq üçün qrup yaratmışıq. Azərbaycanın və onun mərd oğullarının tarix qarşısında əvəzsiz xidmətləri haqqında əsl həqiqətlər üzə çıxarmağa çalışırıq. Uzun müddət kəşfiyyat orqanlarında çalışmış, müharibədən sonra da Vətənində, Qarabağda xidmət etmiş Məmmədhüseyn Əsədova xüsusi xidmət orqanında qulluq edən ermənilər yenə şər və böhtan atıblar. İki dəfə erməni məkrinə tuş gələn Məmmədhüseyn Əsədovun keçmiş xidmətləri nəzərə alınaraq, ona yalnız ulu öndər Heydər Əliyevin hakimiyyəti dövründə müvafiq şərait yaradılıb”, - deyə yazıçı Azər Hacıbəyli vurğulayıb.
Polkovniklər Həmid Cəfərov və Hamlet İsayev, şairə Sarıgül Yağmur Paşaqızı, tarixçi alim Ziyadxan Malıbəyli və digərləri çıxış edərək Böyük Vətən müharibəsində şücaət göstərmiş qəhrəman vətən övladlarının daim xatırlanmasının vacibliyindən, ulu öndər Heydər Əliyevin Böyük Vətən müharibəsi veteranlarına, qəhrəmanlarına diqqət və qayğısından danışıblar. Çıxışlarda tarixi keçmişimizin və milli qəhrəmanlarımızın igidliklərinin gənc nəslə çatdırılmasında belə tədbirlərin əhəmiyyəti vurğulanıb.
Bölmənin digər xəbərləri
