Azərbaycan güləşçiləri Avropa çempionatının finalında
Bakı, 11 may, AZƏRTAC
Bolqarıstanın Samokov şəhərində güləş üzrə U-17 Avropa çempionatına start verilib.
AZƏRTAC xəbər verir ki, ilk yarış günündə yunan-Roma güləşi üzrə 48, 55, 65, 80 və 110 kiloqramlarda finalçılar müəyyənləşib.
Ömər Salmanov (48 kiloqram) türkiyəli Şamil Şahana (8:1), çexiyalı Simon Sritrə (8:0) və macarıstanlı Benedek Tombora (9:0) qalib gələrək finala yüksəlib. Həmyerlimiz sabah həlledici görüşdə rusiyalı Artyom Tkaçenko ilə güləşəcək.
Qurban Məcnunov (55 kiloqram) polşalı Yakub Şkripçakı (9:0), gürcüstanlı Giorgi Kedelidzeni (5:3), ukraynalı Raxman Qamidovu (11:2) və norveçli Abu Bakar Saqayı (9:0) məğlub edərək adını finala yazdırıb. Güləşçimiz sabah çempionluq uğrunda son qarşılaşmada rusiyalı Edem Payziyevlə mübarizə aparacaq.
Orxan Həbibli (65 kiloqram) bolqarıstanlı Antoan Tsvetanovu (7:1) yarışdan kənarlaşdırsa da, 1/4 finalda rusiyalı Aslan Dzuevə 4:8 hesabıyla uduzub. Rəqib finala yüksəldiyi üçün millimizin üzvü sabah təsəlliverici görüşə çıxacaq. Onun rəqibi Dionisios Bulutidis (Yunanıstan) – Qabriel Lunqu (Rumıniya) qarşılaşmasının qalibi olacaq.
Zəka Yusubov (80 kiloqram) rumıniyalı Robert Kukiureana (8:0) və rusiyalı Yeqor Kuropiatnikova (7:6) qalib gəldikdən sonra 1/4 finalda ukraynalı Danyil Melniçuka minimal fərqlə məğlub olub – 3:4.
Məhəmməd Mustafayev isə (110 kiloqram) debütdə ukraynalı Maksim Sokolyuka müqavimət göstərə bilməyib – 0:9.
Bölmənin digər xəbərləri
