Bakı, 12 dekabr, Mikayıl Məmmədov, AZƏRTAC

Mixail Malkin ikiqat Dünya və Avropa çempionu, üçqat tamblinq üzrə Dünya kubokunun qalibidir. O, Azərbaycan milli komandasının tərkibində komanda yarışında Dünya və Avropa çempionu olub, fərdi qələbələri ilə ölkəmizə bir çox mükafatlar gətirib.

Mixail Malkin AZƏRTAC-ın müxbirinə müsahibəsində bu mürəkkəb və möhtəşəm idman növünə necə gəldiyini, tamblinq idmanının populyarlığı ilə bağlı fikirlərini bölüşüb və karyerası boyu zirvədə qalmasına kömək edən motivasiyasının sirlərini açıb.

- Mixail, bir sözlə təsvir edin. Tamblinq sizin üçün nə deməkdir?

- Tamblinq mənim həyatımdır. Mən bütün həyatımı bu idman növünə həsr etmişəm.

- Məhz bu idman növünü seçməyə sizi nə ilhamlandırdı?

- Tamblinqdən əvvəl mən 5 yaşımdan cütlük idman akrobatikası ilə məşğul olmuşam. Sonra paralel olaraq tamblinqlə məşğul olmağa başladım. Mən tamblinqdə irəliləyişin daha sürətli getdiyini və yaxşı nəticələr əldə etdiyimi gördüm. 2009-cu ildə ilk turnirə göndərildim – Dünya birinciliyi və mən tamblinq trekində çıxış etməyə qərar verdim.

- Uğurlu tamblinqçi olmaq üçün ən vacibdir bacarıq və keyfiyyətlər hansılardır?

- Mənə elə gəlir ki, peşəkar tamblinqçi olmaq üçün ən vacib olan güc, koordinasiya və təhlil etmək bacarığıdır.

- Bütün karyeranız boyunca sizə motivasiyalı qalmağa nə kömək edir?

- Dünya çempionatı, Avropa çempionatı, Dünya Oyunları kimi böyük yarışlarda iştirak etməyi xoşlayıram. Mən yeni nailiyyətlər əldə etmək istəyirəm və dəfələrlə - beş qat, altı qat dünya çempionu olmaq istəyirəm. Bu idman növünü davam etdirmək məhz mənim motivasiyamdır.

- Ailənizin və dostlarınızın dəstəyi karyeranızda hansı rol oynayıb?

- Valideynlərim məni idmana gətirməsəydilər, burada olmazdım. Dostlar da öz növbəsində məşq etmək əhvalım olmayan vaxtlarda mənə dəstək oldular. Onlar mənə həmişə məşq etmək və irəliləmək üçün motivasiya veriblər.

- Müsahibələrdən birində siz dediniz ki, tamblinq hələ ki Azərbaycanda o qədər də populyar deyil. Bir neçə il keçdi — onun populyarlaşmasında irəliləyiş varmı?

- Bildiyiniz kimi keçən il komanda yarışında dünya çempionu, bu il isə Avropa çempionu olduq. Əvvəllər təkbaşına çıxış edirdim, indi komandamız, eləcə də 2-3 ehtiyat idmançımız var. Bu artıq az deyil. Düşünürəm ki, irəliləyiş göz qabağındadır.

- Tamblinq karyeranızda mənimsədiyiniz ən çətin olan hansı element və ya kombinasiya olub?

- Məşq zamanı dünyada ən çətin kombinasiyanı yerinə yetirdim, amma hələ yarışda istifadə etməmişəm. Gələcəkdə çətinlik üzrə dünya rekordunu qırmağı planlaşdırıram, ona görə də növbəti yarışlarda bu kombinasiyadan istifadə edəcəyəm. Mən bunun üzərində işləyəcəyəm.

- Hansı elementi ən möhtəşəm və çətin hesab edirsiniz?

- Çox mürəkkəb elementlərimiz var. Məsələn, “ikiqat dörd burulma salto”, “üçlü təkanla dönmə salto” və “qruplaşmada üçlü təkanla dönmə salto”. Mənim üçün onlar ən möhtəşəm və mürəkkəbdir.

- Bu yaxınlarda zədə aldınız. Bərpa prosesi necə gedirdi?

- Mən hələ tam bərpa olunmamışam. İki ay keçdi və indi ayağımı bərpa etmək üçün fiziki hazırlıqla məşğul olmağa başladım. Ümid edirəm ki, yeni ildən tam məşqlərə qayıda biləcəyəm.

- Yaxın gələcəkdə hansı yarışlarda iştirak edəcəksiniz?

- 2025-ci ilin fevral ayında Bakıda Dünya çempionatının keçirilməsi planlaşdırılır. Bu starta hazırlaşmağa çalışacağam, amma böyük ehtimalla zədə səbəbindən risk etməyəcəyəm. İyul ayında Portuqaliyada daha bir dünya çempionatı olacaq və ondan bir ay sonra mənim üçün ən vacib yarış, 2025-ci il avqustun 7-də keçiriləcək Dünya Oyunları olacaq. Hesab edirəm ki, bu startlara mümkün olan ən yaxşı formada başlamaq daha yaxşıdır. Daha sonra Fransada Dünya Çempionatının daha bir mərhələsi olacaq və ondan ay yarım sonra İspaniyada dünya çempionatı keçiriləcək. Düşünürəm ki, yaya qədər tam döyüşə hazır olmalıyam.

- İdman karyeranızı başa vurduqdan sonra nə edəcəyinizi düşünmüsünüzmü?

- Hələ bu barədə düşünməmişəm, çünki tamblinq trekində çıxış etməyi çox sevirəm. İndi fikirlərim tamamilə tullanmaq və yüksək nəticələr əldə etmək üzərində cəmlənib. Hazırda bütün diqqətimi idmançı karyerama yönəltmişəm.