İlk dəfə təşkil olunan “M.A.P” Bakı İncəsənət Festivalı haqqında geniş məlumat verilib
Bakı, 1 noyabr, Flora Şükürova, AZƏRTAC
Noyabrın 1-də “YARAT” Müasir İncəsənət Məkanında “M.A.P” Bakı İncəsənət Festivalına həsr olunmuş mətbuat konfransı keçirilib.
AZƏRTAC xəbər verir ki, konfransda YARAT-ın bədii və strateji direktoru Björn Geldhof ilk dəfə təşkil olunan festivalla bağlı məlumat verib. Bildirib ki, bu festival vasitəsilə teatra yeni baxış tərzi formalaşır: “Bədii proqramlarla yanaşı, müxtəlif sərgilər vasitəsilə insanlara teatr haqqında məlumat veririk. Bu bizim üçün ilk fürsətdir ki, teatr haqqında ictimaiyyətə daha geniş məlumat çatdıraq. Bənzəri və oxşarı olmayan layihə müxtəlif sənət janrlarını ehtiva edir. Festivalın bədii amalı və yüksək hədəfi ilk növbədə gənc nəslə müasir teatr sənətinin mahiyyətini çatdırmaqdan ibarətdir. Məhz bu səbəbdən biz teatr banilərimizin maarifpərvər ideyalarına üz tuturuq, böyük uğur qazanmış modern teatrın parlaq əsərlərini nümayiş etdiririk, musiqi ilə səhnə arasında olan dərin əlaqələri aşkarlayırıq. Ümid edirəm ki, bu sahədə atılan addımlar gələcəkdə daha geniş şəkildə davam edəcək”.
Tədbirin təşkilatçılarından olan “Bakcell” şirkətinin baş direktoru Nikolai Beckers festival haqqında məlumat verib, onun mədəniyyət aləmi üçün əhəmiyyətindən danışıb.
Layihənin kuratoru Ülviyyə Axundova bildirib ki, festivalın məqsədi insanları teatra daha yaxın etməkdir. “Yaranmış vəziyyətin köklərini və bütövlüklə bu fenomeni araşdıranlar teatr böhranından, internetin təsirindən və zamanın tələblərindən nə qədər danışsalar belə, biz “YARAT” olaraq əminik ki, teatr bizə hava və su kimi lazımdır. Bizim növbəti layihəmiz teatr sənəti ilə bağlıdır. Bu, noyabrın 1-dən başlayan birinci “M.A.P” Bakı İncəsənət Festivalıdır. Bənzəri və oxşarı olmayan fantastik bu layihə müxtəlif sənət janrlarını ehtiva edir. Festivalın bədii amalı və yüksək hədəfi, ilk növbədə, gənc nəslə müasir teatr sənətinin mahiyyətini çatdırmaqdan ibarətdir”,- deyə Ü.Axundova söyləyib.
Layihənin kuratoru deyib: “Vaxtilə Azərbaycan teatrını yaradan dahi insanlar sənət vurğunu idilər. Onların teatr ilə bağlı böyük ümidləri hədsiz-hüdudsuz idi. Bütün varlıqları ilə bu sənətkarlar inanırdılar ki, hər bir xalqın teatrı - onun milli məfkurəsinin, daxili mənliyinin, bədii estetikasının güzgüsüdür. Bu teatr korifeyləri yatıb belə yuxularına girməzdi ki, elə bir vaxt gələcək ki, xalqın əksər hissəsi teatra tam laqeyd olacaq və onların nəvə-nəticələri sosial şəbəkələrdəki ünsiyyəti sənətdən üstün tutacaqlar. Sözsüz, teatrı yaradan da, yaşadan da bu sənətə məcnunsayağı vurğun olan insanlardır. Bizim festivalın əsas qəhrəmanları da məhz belə şəxsiyyətlərdir. Onların istedadı, peşəkarlığı elə bir təsir qüvvəsinə malikdir ki, həm gəncləri, həm yaşlı nəsli öz ovsunu ilə alacaqdır. Sizdən gəlmək, bizdən sizi məftun etmək! Səbirsizliklə sizi gözləyirik”.
Sonra festivalın gündəliyi açıqlanıb.
Tamaşalar:
“Bir əsgərin hekayəti” - balet-tamaşasının premyerası, bəstəkar İqor Stravinski, rejissor Mehdi Məmmədov, dirijor Yalçın Adıgözəlov (Azərbaycan)
“Gülməli adamın yuxusu” - “Pyotr Fomenkonun Emalatxanası” teatrı (Rusiya)
“Ked” - “Praktika” teatrı (Rusiya)
“Troya zövcələri” - “Royal District” teatrı (Gürcüstan)
“Birgə yaşama” - “Eskizı v prostranstve” aktyor qrupu (Rusiya)
“Sovrulanlar” baleti - “Novıy Balet” teatrı (Rusiya)
“Çevrilmə” baleti - “Novıy Balet” teatrı (Rusiya)
“Bolero” baleti - “Novıy Balet” teatrı (Rusiya)
“Gaga Intensive” müasir rəqs məktəbinin (İsrail) üçgünlük ustad dərsi
Ruslan Malikovun rejissor sənətinə dair ustad dərsi (“Praktika” teatrı, Rusiya)
Aktyor və rejissor Oleq Lyubimovun mühazirəsi (“Pyotr Fomenkonun Emalatxanası” teatrı, Rusiya)
Səhnə dekoratoru, rəssam Alisa Malikovanın mühazirəsi (“Praktika” teatrı, Rusiya)
Konsert:
Qara Qarayev adına Azərbaycan Dövlət Kamera Orkestri
Bencamin Britten - “Frenk Bric mövzusuna dair variasiyalar”
Sofiya Qubaydulina - “Fachwerk”
Dirijor - Yalçın Adıgözəlov
Solist - Roman Yusipey (Almaniya)
Bölmənin digər xəbərləri
