İndoneziyada daşqın və sürüşmələr nəticəsində ölənlərin sayı 700-ü ötüb
Pekin, 2 dekabr, AZƏRTAC
İndoneziyanın Sumatra adasında musson yağışlarının səbəb olduğu daşqın, torpaq sürüşməsi və palçıq axını nəticəsində ölənlərin sayı 712-yə çatıb.
AZƏRTAC İndoneziyanın təbii fəlakətlərlə mübarizə qurumuna istinadla xəbər verir ki, son dəqiqləşdirmələrə əsasən, 507 nəfər itkin düşüb. Noyabrın 25-dən başlayan şiddətli yağışların səbəb olduğu fəsadlarla əlaqədar adadakı 3 əyalətdən 1,1 milyon nəfər təxliyə edilib. Təbii fəlakət bölgəsində axtarış-xilasetmə və fəlakətin nəticələrinin aradan qaldırılması işləri aparılır. Ölü sayının çoxalma ehtimalı var. Yollar dağıldığı üçün əlaqə kəsilən yaşayış məntəqələrinə ərzaq, dərman və digər zəruri vasitələr yalnız hava nəqliyyatı ilə çatdırılır.
İndoneziyanın Rabitə və Rəqəmsal Məsələlər Nazirliyi təbii fəlakət bölgəsində telekommunikasiya xidmətlərinin bərpası üçün səylərini davam etdirir. Nazirlik Şimali və Cənubi Sumatra əyalətlərində ötürücü qüllələrin 90 faizinin işini bərpa etdiyini açıqlayıb.
Qeyd edək ki, noyabrın 25-dən bəri musson yağışları Cənubi və Cənub-Şərqi Asiyada böyük fəsadlara səbəb olub. Təbii fəlakət Tailand, Şri-Lanka, Malayziyada yüzlərlə insanın ölümünə səbəb olub, ümumilikdə 4 milyon insanın həyatına təsir edib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
