İndoneziyada qəzaya uğramış təyyarənin “qara qutu”sunda olan məlumatlar götürülüb
Tokio, 15 yanvar, AZƏRTAC
İndoneziyalı mütəxəssislər “Sriwijaya Air” şirkətinə məxsus qəzaya uğramış təyyarənin “qara qutu”sundakı məlumatları əldə etməyə nail olublar.
AZƏRTAC xəbər verir ki, bu barədə İndoneziyanın Nəqliyyatda Təhlükəsizliyin Təmin Olunması Komitəsi məlumat yayıb. Bildirilir ki, aparatdakı 330 parametrin hamısı yaxşı vəziyyətdədir.
Uçuşun parametrlərinin əks olunduğu göyərtə aparatı dalğıclar tərəfindən yanvarın 12-də tapılaraq dənizdən çıxarılıb. Pilotların olduğu kabinədəki səsyazan cihazın axtarışları isə hələ də davam edir. Bu günə olan son məlumata görə, onun düşdüyü ərazi artıq müəyyən edilib.
Xatırladaq ki, İndoneziyanın “Sriwijaya Air” şirkətinə məxsus “Boeing 737-500” təyyarəsi yanvarın 9-da Cakarta yaxınlığında dənizə düşüb. Onun göyərtəsində 56 sərnişin və 6 heyət üzvü olub. Komitədən bildirildiyinə görə, təyyarənin göyərtəsində yalnız İndoneziya vətəndaşları olublar.
Hazırda axtarış-xilasetmə işləri davam etdirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
