İnformasiya Texnologiyaları İnstitutunun əməkdaşları beynəlxalq konfransda çıxış ediblər
Bakı, 23 noyabr, AZƏRTAC
Rusiya Elmlər Akademiyası İdarəetmə Problemləri İnstitutunun təşkilatçılığı ilə Moskvada “İnnovasiyaların idarə edilməsi” mövzusunda onlayn beynəlxalq konfrans keçirilib.
AMEA İnformasiya Texnologiyaları İnstitutunun şöbə müdiri, iqtisad üzrə fəlsəfə doktoru, dosent Əlövsət Əliyev və böyük elmi işçi Roza Şahverdiyeva beynəlxalq konfransda məruzələrlə çıxış ediblər.
İnstitutdan AZƏRTAC-a bildirilib ki, dosent Ə.Əliyev “İnformasiya iqtisadiyyatı sektorlarının innovativ perspektivlərinin çoxmeyarlı ekspert qiymətləndirməsinin modelləşdirilməsi prosesləri” mövzusunda çıxış edib.
Məruzədə yeni informasiya, bilik və texnoloji tutumlu iqtisadiyyat sahələri haqqında məlumat verilib, informasiya iqtisadiyyatı problemlərinin tədqiqi və işlənilmə dərəcəsi ətraflı təhlil olunub.
İnstitutun böyük elmi işçisi Roza Şahverdiyeva isə “Texnoparklarda innovasiyanı və innovativ fəaliyyəti xarakterizə edən göstəricilər sisteminin işlənilməsi” mövzusunda məruzə ilə çıxış edib. Çıxış zamanı iqtisadi inkişafda innovativ texnopark strukturlarının rolu, əhəmiyyəti və fəaliyyət xüsusiyyətləri təhlil edilib.
Sonda hər iki məruzəçi konfrans iştirakçılarının suallarını cavablandırıb və institutlararası beynəlxalq əlaqələrin inkişaf etdirilməsində maraqlı olduqlarını bildiriblər.
Bölmənin digər xəbərləri
