İnquş Respublikasının rəhbəri Yunusbek Yevkurov Təzəpir məscid kompleksi ilə tanış olmuşdur
Bakı, 24 iyun (AZƏRTAC, Samirə Allahverdiyeva). Azərbaycanda səfərdə olan Rusiya Federasiyasının İnquş Respublikasının rəhbəri Yunusbek Yevkurov iyunun 24-də Qafqaz Müsəlmanları İdarəsinin sədri şeyxülislam Allahşükür Paşazadə ilə görüşmüşdür.
AZƏRTAC xəbər verir ki, əvvəlcə İnquş Respublikasının rəhbəri Yunusbek Yevkurov şeyxülislam Allahşükür Paşazadə ilə birgə Təzəpir məscid kompleksi, Qafqaz Müsəlmanları İdarəsinin kitabxanası, burada saxlanılan qədim kitablarla tanış olmuşdur. Təzəpir məscid-kompleksini ziyarət edən qonaq Qafqazın dini liderini səmimi salamlayaraq onunla hər görüşünü yüksək dəyərləndirdiyini bildirmişdir.
Qafqaz Müsəlmanları İdarəsi sədrinin iqamətgahında keçirilən görüşdə ikitərəfli münasibətlər, xalqlarımız arasında dostluq əlaqələri, dini məsələlər barədə fikir mübadiləsi aparılmışdır.
A.Paşazadə Azərbaycan ilə Rusiya arasında əlaqələrin yüksək səviyyədə olduğunu məmnunluqla qeyd etmişdir.
Şeyxülislam Azərbaycan ilə İnquş Respublikası arasında əlaqələrin inkişafının əhəmiyyətindən danışmış, ölkəmizin tolerantlıq nümunəsi olduğunu vurğulamışdır. Diqqətə çatdırmışdır ki, Azərbaycan və inquş xalqları arasında dostluq münasibətlərinin qədim tarixi vardır. Bu münasibətlərin inkişafında islam dini mühüm rol oynayır.
Xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsindən danışan şeyxülislam demişdir ki, problem ölkəmizin ərazi bütövlüyü çərçivəsində, sülh yolu ilə həll olunmalıdır. Bu, Azərbaycanın dəyişməz mövqeyidir.
Şeyxülislam Qafqaz regionunda sülhün bərqərar olunmasının, sabitliyin vacibliyindən də bəhs etmişdir.
Bakıda olmağından məmnunluğunu bildirən İnquş Respublikasının rəhbəri Yunusbek Yevkurov göstərilən qonaqpərvərliyə və dostluq münasibətlərinə görə təşəkkürünü bildirmişdir.
Qonaq xalqlarımız arasında həmişə səmimi və doğma münasibətlərin olduğunu diqqətə çatdırmış, Azərbaycanda müxtəlif dini konfessiyaların nümayəndələrinin mehriban münasibətindən, əməkdaşlığından məmnunluğunu söyləmişdir.
Respublikamızda aparılan geniş quruculuq işləri, siyasi, iqtisadi, sosial sahələrdə tərəqqini yüksək dəyərləndirən qonaq Azərbaycanın Qafqaz bölgəsində lider rolu oynadığını xüsusi vurğulamışdır. Bildirilmişdir ki, Azərbaycanda mövcud tolerantlıq və din-dövlət münasibətləri bütün Qafqaz üçün örnəkdir.
İnquş Respublikasının rəhbəri Qafqaz regionunda dini radikalizmə qarşı birgə mübarizə aparmağın əhəmiyyətini vurğulamışdır. Qəbələdə keçirilən V Azərbaycan-Rusiya Regionlararası Forumunun təşkilini də yüksək qiymətləndirən Yunusbek Yevkurov ətraf rayonlarda da olduğunu, orada yaşayan digər xalqların necə firavan ömür sürdüklərini qeyd etmişdir. Vurğulanmışdır ki, bütün bunlar Azərbaycan Prezidenti İlham Əliyevin apardığı uğurlu siyasətin nəticəsidir.
Sonda qarşılıqlı hədiyyələr təqdim olunmuşdur. Yunusbek Yevkurov Allahşükür Paşazadəyə inquş dilinə tərcümə olunmuş, balıq dərisindən ibarət Qurani-Kərim hədiyyə etmişdir.
Bölmənin digər xəbərləri
