İQTİSADİ İNKİŞAF NAZİRLİYİNİN MƏLUMATI
Orta və iri müəssisələrin investisiya müsabiqəsi yolu ilə satılmasında iddiaçılar qarşısında qoyulan şərt və tələblərdən biri də təqdim edilən investisiya proqramlarının sosial yönümlülüyünə xüsusi diqqət yetirilməsidir. Belə ki, müəssisələrdə yeni iş yerlərinin açılması, işçilərin sosial-məişət şəraitinin yaxşılaşdırılması, onların sağlamlığının və təhlükəsiz iş rejiminin təmin olunması investisiya proqramlarının sosial yönümlülüyünü müəyyənləşdirən əsas cəhətlərdəndir.
Pozulmuş iqtisadi münasibətlərin bərpası, yeni iqtisadi tərəfdaşlarla əlaqələrin qurulması, başlıcası isə müəssisələrə investisiya yatırımı istehsal prosesinin bərpası və genişləndirilməsinə, yeni iş yerlərinin açılmasına şərait yaradır.
Son vaxtlar investisiya müsabiqəsi ilə özəlləşdirilmiş müəssisələr üzrə investisiya proqramlarında sərmayələrin müəyyən hissəsinin məhz bu məqsədlərə yönəldilməsi nəzərdə tutulmuşdur.
“Bakı-Tütün”, “Qaradağ-Sement”, “Siyəzən-Broyler”, “Bakıelektroqaynaq” və s. SC-lərin səhmlərinin satışı üzrə investisiya müsabiqələrinin qalibləri tərəfindən işçilərin sosial şəraitinin yaxşılaşdırılması istiqamətində həyata keçirilən tədbirlər buna misal ola bilər.
Investisiya müsabiqəsi yolu ilə özəlləşdirilmiş quş əti, yumurta istehsalı və satışı ilə məşğul olan “Siyəzən-Broyler” SC-də hazırda 600 nəfər işçi çalışır. 2002-ci ilin sonuna qədər SC-də 1200 nəfərə yaxın vətəndaşın işlə təmin olunması gözlənilir.
Eyni üsulla özəlləşdirilmiş “Göradil Quşçuluq” SC-də hazırda investisiya qoyuluşları davam etdirilir. Müəssisədə 70 nəfərə yaxın işçi çalışacaqdır. Bundan başqa, “Azərmaşavadanlıq” SC-də 300 nəfərin, “Bakıkimyaəczasənaye” SC-də 120 nəfərin işlə təmin olunması , habelə sosial tədbirlərin həyata keçirilməsi nəzərdə tutulur. Investisiya proqramına uyğun olaraq, “Sabunçu Azot-Oksigen” SC-də 100 nəfər, “Bakı Şifer və Keramika” SC-də 340 nəfər işlə təmin olunmuşdur. Hazırda “Bakıelektroqaynaq” SC üzrə keçirilmiş investisiya müsabiqəsinin qalibi “Bakı Steel Company” şirkəti tərəfindən inşa edilmiş poladtökmə zavodunda 400 nəfər işçi çalışır.
Investisiya qoyuluşları nəticəsində iş ahənginin artması ilə əlaqədar müəssisələrdə yeni iş yerləri açılacaqdır.
Artıq bir sıra müəssisələr üzrə investisiya müsabiqələrinin qalibləri təklif etdikləri investisiya proqramlarında nəzərdə tutulmuş tədbirlərin həyata keçirilməsini təmin etmişlər. “Qaradağ-Sement” SC səhmlərinin 86 faizi, “Bakı-Tütün” SC səhmlərinin 92,5 faizi, “Bakıelektroqaynaq” SC səhmlərinin 95,73 faizi üzərində mülkiyyət hüququ investisiya müsabiqəsi qaliblərinə məxsusdur.
“Bakı Mayesiz Transformatorlar”, “Bakı Şampan Şərabları”, “Bakı Şifer və Keramika” və “Sabunçu Azot-Oksigen” səhmdar cəmiyyətləri üzrə keçirilmiş investisiya müsabiqələrinin qalibləri investisiya proqramlarının yerinə yetirilməsini başa çatdırmaqdadırlar. Digər müəssisələr üzrə qaliblər investisiya qoyuluşunu, sosial proqramların həyata keçirilməsini davam etdirirlər.
Bölmənin digər xəbərləri
