İranda fəaliyyət göstərən “Azərbay” şirkətinin yaranmasından beş il ötür
Tehran, 4 fevral (AZƏRTAC). İranda fəaliyyət göstərən “Azərbay” türkcə çap və yayım şirkətinin yaranmasından beş il ötür.
Şirkətin baş direktoru İsmayıl Yusifoğlunun məlumatına görə, ötən dövrdə Azərbaycan xalqının tarixinə, ədəbiyyatına, görkəmli şəxslərin həyat və fəaliyyətinə aid mindən artıq kitab nəşr edilmiş və yayılmışdır. Şirkətin nəşrləri arasında Azərbaycana qarşı erməni təcavüzünün tarixi, o cümlədən Ermənistan-Azərbaycan, Dağlıq Qarabağ münaqişəsi ilə bağlı kitabların türk və fars dillərində nəşr edilib yayılması mühüm istiqamətdir.
Bu sırada T.Məlikzadənin “Azərbaycan Birinci Dünya müharibəsində və yaxud “Cilovluq” faciələri”, C.Mirzənin “Yeni tarix”, R.Talibin “1915-ci il (müsəlmanlarla ermənilər arasında gərginliyin və müsəlman soyqırımlarının 8 əsrlik tarixinə baxış)“, M.S.Ordubadinin “Qanlı illər (1905-1906)” və digər sanballı əsərləri göstərmək olar.
Naşirin sözlərinə görə, şirkət gələcəkdə fəaliyyətini daha da genişləndirmək üçün maddi-texniki bazasının müasirləşdirməklə bərabər, Azərbaycan tarixini, mədəniyyətini və ədəbiyyatını mükəmməl bilən yerli mütəxəssisləri şirkətin işinə cəlb etmək niyyətindədir.
Sabir Şahtaxtı
AZƏRTAC-ın xüsusi müxbiri
Tehran
Bölmənin digər xəbərləri
