İRANDA XOCALI SOYQIRIMININ İLDÖNÜMÜ İLƏ BAĞLI TƏDBİRLƏR KEÇİRİLMİŞDİR
Ermənilərin azərbaycanlılara qarşı apardığı soyqırımı siyasətinin nəticəsi olan Xocalı faciəsi ilə bağlı ölkəmizin İrandakı səfirliyində bir sıra tədbirlər keçirilmişdir.
Səfirlikdən AZƏRTAC-a daxil olmuş məlumatda bildirilir ki, bu münasibətlə keçirilən mətbuat konfransında Ermənistan-Azərbaycan, Dağlıq Qarabağ münaqişəsinin yaranma səbəbləri haqqında danışılmış, “Böyük Ermənistan” yaratmaq xülyası ilə işğalçılıq siyasəti aparan Ermənistanın hərbi təcavüzü nəticəsində torpaqlarımızın 20 faizinin zəbt olunduğu, bir milyondan artıq soydaşımızın qaçqın və məcburi köçkünə çevrildiyi bildirilmişdir.
Səfirliyin əməkdaşları Qum şəhərindəki dini mədrəsələrdə təhsil alan azərbaycanlı tələbələrin Xocalı soyqırımının ildönümü ilə bağlı təşkil etdikləri tədbirdə iştirak etmişlər. Mərasimdə vaxtilə Qarabağ uğrunda döyüşlərdə iştirak etmiş tələbələrdən bir neçəsi Ermənistanın təcavüzkar siyasəti və müharibənin dəhşətləri haqqında təəssüratlarını bölüşmüşlər. Toplaşanlara Ermənistan-Azərbaycan, Dağlıq Qarabağ müharibəsi ilə bağlı geniş məlumat verilmişdi. Sonra tələbələrin Xocalı faciəsi ilə bağlı hazırladıqları fotosərgiyə baxış olmuşdur.
Səfirlikdə Xocalı soyqırımı ilə əlaqədar anma mərasimi keçirilmişdir. Mərasimdə Tehranda akkreditə olunan diplomatik nümayəndəliklərin rəhbərləri, İran ictimaiyyətinin nümayəndələri, bu ölkənin ali məktəblərində təhsil alan azərbaycanlı tələbələr iştirak etmişlər. Tədbirdə iranlı şair, əslən azərbaycanlı olan Haşım Tərlan Xocalı faciəsinə həsr etdiyi şeirini oxumuşdur:
Xocalı inləmə, dözümün olsun,
Sənsiz daş üstündə oturmuşuq biz.
Anamız Vətənin gözü yoldadır,
Sənin ürəyinlə vurur qəlbimiz.
Bölmənin digər xəbərləri
