İraq Çinlə milyard dollarlıq neft sazişi imzalayacaq
Bakı, 9 dekabr, AZƏRTAC
İraq Çinin “ZhenHua Oil Co.” şirkəti ilə milyard dollarlıq müqavilə imzalamağa hazırlaşır.
AZƏRTAC “Bloomberg”ə istinadla xəbər verir ki, yaşadığı çətinliklərin neft bazarındakı tarazlığa təsir etdiyi İraqa Çin öz kömək əlini uzatmağa qərar verib.
İraqın neft ixracından məsul “SOMO” şirkəti müxtəlif neft şirkətlərinin razılaşma təkliflərini qiymətləndirdikdən sonra “ZhenHua”nı seçib. Uzun müddətdir nağd valyuta baxımından çətinlik çəkən İraqın uzunmüddətli neft tədarükü müqabilində rəsmi Pekindən nağd ödəniş alacağı açıqlanıb.
Bu, Çinin dövlət tərəfindən idarə olunan banklarının və şirkətlərinin Anqola, Venesuela və Ekvador kimi neft hasil edən həssas ölkələrə dəstəyinin daha bir nümunəsi olacaq.
Qeyd edək ki, bu il neft qiymətlərindəki azalma İraqın büdcəsinə mənfi təsir edib, hökumətin müəllimlər və məmurlara maaşlarını vaxtında ödəyə bilməməsinə səbəb olub.
Bölmənin digər xəbərləri
