İstanbulda 20 Yanvar faciəsinin 23-cü ildönümü ilə bağlı tədbir keçiriləcəkdir

16.01.2013 [20:20]
Çap et
A⁺ A^-

Ankara, 16 yanvar (AZƏRTAC). Azərbaycanın İstanbuldakı baş konsulluğundan AZƏRTAC-a bildirmişlər ki, diplomatik nümayəndəliyimizdə 20 Yanvar faciəsinin 23-cü ildönümü münasibətilə sərgi və konfrans keçiriləcəkdir.

İstanbuldakı diaspor təşkilatları, iş adamları və bu şəhərdəki azərbaycanlı tələbələrin iştirakı ilə baş konsulluqda Qanlı Yanvara həsr olunmuş fotosərginin açılışı olacaqdır.

Sərginin açılışından sonra keçiriləcək konfransda Yıldız Universitetinin professoru Adil Allahverdiyev, İstanbul Azərbaycan-Türkiyə Dərnəyinin sədri Səfər Karakoyunlu, Azərbaycan İstanbul Kültür Dərnəyinin sədri Hikmet Erp, Türk-Azərbaycan Dostluq, Kültür və Dayanışma Dərnəyinin sədri Salih Bayraktar 20 Yanvar faciəsi və xalqımızın başına gətirilən müsibətlər, qətliamlar haqqında çıxışlar edəcəklər.

Konfransın sonunda “Azadlığa gedən yol” filmi nümayiş etdiriləcəkdir.

Oqtay Bayramov

AZƏRTAC-ın xüsusi müxbiri

Ankara