İsveç sahillərində gəmi saya oturub, neft dənizə dağılıb
Stokholm, 23 oktyabr, Nərgiz Cəfərli, AZƏRTAC
İsveçin Karlshamn şəhəri yaxınlığında qapalı vəziyyətdə qalan “Marko Polo” sərnişin gəmisindən neft sızması baş verib.
AZƏRTAC xəbər verir ki, Sahil Mühafizə Xidməti hazırda yanacağın geniş sahəyə yayılmasını məhdudlaşdırmaq üçün İsveçin cənubundakı qüvvələri səfərbər etməklə məşğuldur. Bununla yanaşı, dağılmış neftin həcminin qiymətləndirilməsi çətinləşib.
“Gəmidə neftin nə qədər olduğunu bilirik, amma dağılan miqdarı müəyyən etmək çətindir. Xüsusilə söhbət qatı neft, dizel yanacağı və digər kimyəvi maddələrdən gedir. Qapalı vəziyyətdə qalan gəmiyə ciddi ziyan dəyib”, - deyə gəmiyə ilk baxışı həyata keçirən İsveç Nəqliyyat Agentliyinin gəmi müfəttişi bildirib.
Sahil mühafizəsinin havadan çəkilən görüntülərinə görə, “Marko Polo” gəmisi saya oturduqdan sonra dağılan neft sahil boyunca bir neçə dəniz mili yayılıb.
Gəminin qapalı qalması ilə bağlı həyəcan siqnalı bazar günü saat 06:25-də daxil olub. Daha sonra isə gəminin iki dəfə saya oturduğu, lakin birinci dəfədən həyəcan siqnalı verilmədiyi üçün neftin bir neçə dəniz mili boyunca dağıldığı məlum olub.
Neftin dənizdən təmizlənməsi işləri sürətlə davam edir, çünki çərşənbə axşamı yağış və güclü külək gözlənilir.
Sahil Mühafizə Xidməti artıq dəniz qanunvericiliyinin pozulması ilə bağlı ilkin araşdırmaya və gəmilərdən çirklənmənin qadağan edilməsi tədbirlərinə başlayıb.
Bölmənin digər xəbərləri
