İSVEÇRƏLİ VADİM MİLOV “PREZİDENT KUBOKU” FESTİVALINDA “BLİTS” TURNİRİN QALİBİ OLMUŞDUR
AZƏRTAC xəbər verir ki, Bakı Əyləncə Mərkəzində ümummilli lider Heydər Əliyevin xatirəsinə həsr olunmuş “Prezident kuboku” ikinci beynəlxalq şahmat festivalına mayın 12-də yekun vurulmuşdur.
Festivalın sonuncu günü “Blits” (sürətli) turnir üzrə qaliblər müəyyənləşmişdir. Doqquz turdan ibarət yarışın nəticələrinə əsasən, isveçrəli Vadim Milov 8 xal toplayaraq “Blits” turnirin qalibi olmuşdur. Hərəyə 7,5 xal toplamış Azərbaycan şahmatçıları Qədir Hüseynov və Rauf Məmmədov ikinci - üçüncü yerləri bölüşmüşlər.
Fərqlənmiş şahmatçılara pul mükafatı və qiymətli hədiyyələr təqdim olunmuşdur.
Xatırladaq ki, 11 gün davam etmiş festival çərçivəsində 4 turnir keçirilmişdir. Almaniyalı beynəlxalq qrossmeyster Arkadi Naydiç festivalın nüfuzlu açıq turnirinin baş mükafatına layig görülmüşdür. Azərbaycan təmsilçiləri Zaur Məmmədov uşaqların, Oleq Pavlenko isə veteranların turnirində fəxri kürsünün ən yüksək pilləsinə qalxmışlar.
Bölmənin digər xəbərləri
