İtaliyada taksi sürücüləri tətil elan ediblər

25.11.2021 [03:24]
Çap et
A⁺ A^-

Roma, 25 noyabr, AZƏRTAC

İtaliyada taksi sürücüləri hökumətin hazırladığı bu sektoru rəqabətə və transmilli şirkətlərə açmağı nəzərdə tutan qanun layihəsinə etiraz əlaməti olaraq tətil elan ediblər.

AZƏRTAC xəbər verir ki, ölkənin müxtəlif bölgələrindən gələn və yeni qaydalara etiraz edən taksi sürücüləri paytaxt Romada yürüş keçirib. Paytaxtın əsas meydanlarından biri olan “Repubblica”ya toplaşan minlərlə taksi sürücüsünün etirazına müxtəlif həmkarlar ittifaqları da dəstək verib.

Taksi sürücüləri COVID-19 epidemiyasının bu sektora mənfi təsir göstərdiyi bir vaxtda hökumətin rəqabətlə bağlı hədəfinin onlar üçün zərbə olduğunu bildiriblər.

Polis yürüş təşkil edilən ərazidə təhlükəsizlik tədbirlərini artırıb.

Nihad Budaqov

AZƏRTAC-ın xüsusi müxbiri

Roma