Roma, 22 sentyabr, AZƏRTAC

Azərbaycan öz ərazisinin beynəlxalq səviyyədə tanınmış hissəsi üzərində suverenliyini bir daha təsdiqlədi və bu illər ərzində aparılan mübahisəyə ustalıqla son qoydu.

Bu sözləri İtaliyanın “İl Giornale” qəzetinin və həmin qəzetə bağlı “Insideover” analitik portalının müxbiri Emanuel Pietrobon AZƏRTAC-a müsahibəsində deyib.

Jurnalist bildirib ki, Cənubi Qafqazın “Qara bağı” ilə bağlı uzun müddət davam edən mübahisə Stalinin ovaxtkı Sovet Azərbaycanının yurisdiksiyasına verdiyi Dağlıq Qarabağ Muxtar Vilayətinin yaradılmasının 100-cü ildönümündə - 2023-cü ildə bitə bilər. Rəsmi Bakının sentyabrın 19-da başlatdığı və təqribən 24 saat davam edən lokal xarakterli antiterror tədbirləri Azərbaycanın suveren ərazisində mövcud olan erməni separatçılarının son müdafiə qalasını da zərərsizləşdirdi. Hazırda müzakirələr aparılır. Bu, 1988-2022-ci illər arasında əlli mindən çox insanın ölümünə səbəb olmuş və region xalqlarının taleyində silinməz iz qoymuş bir məsələnin qəti həllinə gətirib çıxara bilər.

“Ermənistanın baş nazirinin əməliyyatlara qarışmamaq qərarı Azərbaycanın həyata keçirdiyi lokal xarakterli antiterror tədbirlərinin nəticələnməsinə kömək etdi. Rəsmi Bakının daxili işi kimi müəyyən edilən bu antiterror tədbirləri əməliyyatın genişlənmiş müharibəyə çevrilməsinin qarşısını aldı. Lakin regionun ən yaxşı ordusuna və inkişaf edən iqtisadiyyata malik olduğunu hələ 2020-ci ildə sübut edən Azərbaycanla böyük və uzunmüddətli münaqişəni davam etdirmək üçün Ermənistanın insan, iqtisadi və hərbi resursları yox idi və yoxdur. Əgər bu, separatçılar üçün qeyd-şərtsiz təslim olmaq deməkdirsə, İrəvan və Bakı üçün isə ikitərəfli münasibətlərdə yeni mərhələnin başlanğıcı ola bilər”, - deyə Emanuel Pietrobon qeyd edib.

İtaliyalı jurnalist əlavə edib ki, Ermənistanın baş naziri Paşinyan İrəvanın maliyyəsi üçün dayanıqsız yükə çevrilmiş separatçıları öz taleyinə buraxdı. Bunun müqabilində isə Bakı və Ankara ilə diplomatik normallaşma və transkontinental ticarət dəhlizlərinin keçdiyi ərazi olan Qafqazın iqtisadi həyatına inteqrasiya perspektivini əldə etdi.

Nihad Budaqov

AZƏRTAC-ın xüsusi müxbiri

Roma