Bakı, 23 dekabr, AZƏRTAC

Hər bir insan istəyir ki, təhlükəsiz yaşasın, daim inkişaf etsin, arzularını reallaşdırsın, cəmiyyətdə özünü təsdiq etsin, ən əsası, gələcəyindən arxayın olsun. Bütün bunlar o zaman həqiqətə çevrilir ki, həmin xalqın verdiyi sözü əməli fəaliyyəti ilə yerinə yetirən, sabitliyin qarantı olan, beynəlxalq aləmdə yüksək nüfuz qazanan, ölkənin çiçəklənməsini təmin edən, özünü hər bir vətəndaşın Prezidenti kimi təsdiqləyən lideri olsun.

Bu gün qürurla deyirik ki, Azərbaycan nəinki regionun, dünyanın lider ölkələri sırasındadır. Hazırda əksər regional və ya beynəlxalq layihələr Azərbaycanın iştirakı olmadan reallaşmır. Hətta elə vacib görüş və tədbirlər var ki, onların keçirilməsi üçün məhz Azərbaycan seçilir və əlbəttə ki, bunun çox ciddi əsası var. Dünyanın müxtəlif yerlərində dövlətlərin bir-birinə qarşı düşmənçiliyini, dözümsüzlüyünü, etnik təmizləmələri, terror aktlarının törədildiyini, dini, milli, irqi ayrı-seçkiliyi müşahidə edirik. Bütün bunların fonunda Azərbaycanda insanlar təhlükəsiz və tolerant mühitdə, mehriban şəraitdə yaşayırlar və əlbəttə ki, hər bir inkişafın nüvəsini sabitlik təşkil edir. Biz buna təkcə mənsub olduğumuz mədəni keyfiyyətlərlə, qonaqpərvərliyimizlə, gözəl təbiətimizlə deyil, həm də dövlətimizin başçısının yürütdüyü düşünülmüş siyasət nəticəsində nail olmuşuq.

Bu fikirləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədri, professor Hicran Hüseynova söyləyib. O qeyd edib ki, tarix üçün 20 il çox qısadır, amma bu müddəti addım-addım inkişaf yolu keçən bir ölkə üçün heç də az zaman deyil. Prezident İlham Əliyev ötən müddət ərzində öz fəaliyyəti ilə hər bir azərbaycanlının Prezidenti olduğunu dəfələrlə sübuta yetirib. O, Ümummilli Lider Heydər Əliyevin ideyalarını daha da inkişaf etdirərək uğurlu daxili və xarici siyasət həyata keçirib. Bunun nəticəsində Azərbaycan daha da güclənib, dünya miqyasında söz sahibi olan dövlətə çevrilib. Paytaxt Bakı ən mötəbər beynəlxalq tədbirlərə ev sahibliyi edir. Ötən müddət ərzində Azərbaycanda çox mühüm dəyişikliklər baş verib, nailiyyətlər əldə edilib. Prezident İlham Əliyevin uğurlu dövlət idarəçiliyi, onun rəhbərliyi ilə aparılan sistemli islahatlar, bölgələrin inkişafına yönəldilən sosial-iqtisadi proqramlar nəticəsində şəhərlə kənd arasında fərq aradan qaldırılıb, vətəndaşların rifahı, mənzil-məişət şəraiti daha da yaxşılaşdırılıb. Prezident İlham Əliyev həmişə qeyd edir ki, bizim siyasətimizin mərkəzində Azərbaycan vətəndaşları, onların maraqları dayanır. Biz ölkə başçısının fəaliyyətində bunun əyani təsdiqini görürük. Vahid dövlətçilik siyasəti nəticəsində Azərbaycan iqtisadi, siyasi, mədəni, sosial, hərbi, idman sahələrində davamlı və dinamik sürətlə inkişaf edir.

Hicran Hüseynova Prezident İlham Əliyevin hakimiyyətdə olduğu 20 ildə ölkədə sosial-iqtisadi sahədə əldə edilən nailiyyətləri diqqətə çatdırıb: “Dövlət büdcəsinin illik sosial müdafiə xərcləri 20 dəfədən çox artıb. Minimum əməkhaqqı 38 dəfə, orta aylıq əməkhaqqı 12 dəfə, minimum pensiya 14 dəfə, orta aylıq pensiya 18 dəfə, yaşa görə orta aylıq pensiya 19 dəfə, əlilliyə görə pensiya 14 dəfə, ailə başçısını itirməyə görə pensiya 19 dəfə artıb. Pensiya üzrə ödənilən illik vəsait 30 dəfə artaraq 6 milyard manata çatıb. 2003-cü illə müqayisədə 2022-ci ildə yoxsulluq səviyyəsi 44,7 faizdən 5,5 faizə enib, orta aylıq əməkhaqqı 77.4 manatdan 839,4 manata yüksəlib. 2004-cü ildən bəri regionlarda 1,8 milyondan çox yeni iş yeri və 52 mindən artıq yeni müəssisə yaradılıb. Ötən müddət ərzində əsas hissəsi bölgələrə aid olmaqla 3600-dən çox məktəb, 450-dən çox uşaq bağçası, 760-a yaxın tibb müəssisəsi, 500-dən çox körpü və tunellər tikilib və ya təmir olunub. Ölkədə 43 Olimpiya İdman Kompleksi fəaliyyət göstərir. Erməni işğalından azad olunmuş Qarabağ və Şərqi Zəngəzurun yenidən qurulması dövlətimizin prioritetidir. Qısa müddət ərzində Böyük Qayıdışa dair Dövlət Proqramı çərçivəsində mühüm layihələr həyata keçirilib, genişmiqyaslı tikinti işləri, bərpa-quruculuq tədbirləri aparılır. Artıq keçmiş məcburi köçkünlər öz doğma torpaqlarına əbədi yaşamaq üçün qayıdırlar”.

Deputat vurğulayıb ki, Bakı-Tbilisi-Ceyhan neft boru kəməri, Cənubi Qafqaz qaz boru kəməri, TANAP və TAP layihələri dünya dövlətləri ilə Azərbaycanın yeni münasibətlərinin qurulmasına təkan verib, ölkəmizin xarici siyasətinin güclənməsinə və inkişaf etməsinə zəmin yaradıb. Avtomobil yollarının və dəmir yolu xətlərinin, xüsusilə Gürcüstan, Rusiya və İran istiqamətində ölkə ərazisindən keçən magistral yolların beynəlxalq standartlar əsasında yenidən qurulması, Bakıda və regionlarda beynəlxalq hava limanları, Bakı-Tbilisi-Qars dəmir yolu və Bakı Beynəlxalq Dəniz Ticarət Limanı, eləcə də Şərq-Qərb və Şimal-Cənub nəqliyyat dəhlizlərinin inkişafı istiqamətində həyata keçirilən tədbirlər Azərbaycanın nəqliyyat infrastrukturunun inkişafında əhəmiyyətli rol oynamaqla yanaşı, ölkəmizin tranzit potensialını daha da gücləndirib. Prezident İlham Əliyev Azərbaycanı enerji təhlükəsizliyinin təmin edilməsi baxımından Avropa İttifaqının ən mühüm tərəfdaşına çevirdi. Onun sayəsində Azərbaycan dünyanın bir çox ölkələrində, beynəlxalq təşkilatlarda böyük nüfuza malikdir.

İyirmi il əvvəl Azərbaycana rəhbərlik etməyə başlayan İlham Əliyev o vaxta qədər artıq həyatda böyük yol keçmiş, elə böyük təcrübə qazanmışdı ki, bir çox siyasətçilər bütün həyatı boyu qazana bilmirlər. O, Azərbaycan Milli Olimpiya Komitəsinin prezidenti, Milli Məclisin deputatı, Azərbaycanın Avropa Şurasının Parlament Assambleyasındakı (AŞPA) nümayəndə heyətinin rəhbəri, SOCAR-ın birinci vitse-prezidenti kimi fəaliyyət göstərmişdi. Yəni o, artıq dünyanın idman, siyasi, iqtisadi elitasının necə olduğunu hərtərəfli bilirdi. Onun böyük siyasətə tamamilə təsadüfən, hazırlıqsız gəlmiş müxtəlif ölkələrin indiki liderlərinin bir çoxundan fərqli olaraq biliyi, bacarıqları, təcrübəsi var. Ən əsası isə o, dahi Heydər Əliyev məktəbini keçib. Bu məktəb bütün universitet və institutlardan üstündür. Bu, həyat məktəbidir, Azərbaycanın milli maraqlarının necə müdafiə olunacağı ilə əməli tanışlıq məktəbidir. Prezident, Ali Baş Komandan İlham Əliyevin rəhbərliyi ilə Azərbaycan dövlətinin necə böyük Qələbə qazandığını gördük. Bu, təkcə Ermənistan və Qarabağ separatçıları üzərində deyil, həm də dünya erməniləri və onların havadarları üzərində Qələbə idi. Bu Qələbə Ermənistan-Azərbaycan münaqişəsinin hərbi yolla həlli olmadığını təkid edən ATƏT-in Minsk qrupunun həmsədr ölkələrinin yanlış mövqeyini sübut etdi. Azərbaycan Prezidenti İlham Əliyev sübut etdi ki, bu münaqişə yalnız hərbi yolla həll edilə bilər və həll edilməli idi. Çox yaxşı xatırlayıram ki, 2020-ci il noyabrın 8-də Şəhidlər xiyabanında Azərbaycan Prezidenti İlham Əliyev xalqa müraciətlə çıxış edərək Şuşa şəhərinin işğaldan azad olunduğunu elan etdi: “Bu gün mən Ulu Öndər Heydər Əliyevin məzarını ziyarət etdim, xatirəsi önündə baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu Öndərin ruhu şaddır bu gün! Gözün aydın olsun Azərbaycan! Gözünüz aydın olsun dünya azərbaycanlıları! Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik!”

2023-cü ildə oktyabrın 15-də Xankəndidə Azərbaycanın Dövlət Bayrağını ucaldan Prezident İlham Əliyev xalqa müraciət edərək dedi: “Düz 20 il bundan əvvəl Azərbaycan xalqı mənə böyük etimad göstərərək prezident seçkilərində Prezident vəzifəsinə seçmişdir. O vaxt doğma xalqıma müraciət edərək söz vermişdim ki, Azərbaycan xalqının və Azərbaycan dövlətinin milli maraqlarını müdafiə edəcəyəm, Azərbaycanın ərazi bütövlüyünü qoruyacağam. Konstitusiyaya və “Qurani-Kərim”ə əl basaraq and içmişdim. Şadam ki, son 20 il ərzində verdiyim bütün vədlər, qarşıma qoyduğum bütün vəzifələr icra edildi”. Bəli, Azərbaycan ərazilərinin erməni işğalından azad edilməsi, ölkəmizdə separatizmin məhv edilməsi, 200 ildən sonra tarixi Qələbənin əldə olunması onun adı ilə bağlıdır.

Adı müasir Azərbaycan tarixinə qızıl hərflərlə yazılan Prezident, Ali Baş Komandan İlham Əliyev bundan sonra da dövlətimizin və dövlətçiliyimizin inkişafını böyük əzmlə davam etdirəcək. Bu, tək Azərbaycanda deyil, dünyanın müxtəlif ölkələrində yaşayan hər bir azərbaycanlının inamıdır.