Kaliforniyada elektrik stansiyasında güclü yanğın baş verib
Bakı, 17 yanvar, AZƏRTAC
ABŞ-ın Kaliforniya ştatının Moss-Lendinq şəhərindəki böyük elektrik stansiyasında yanğın baş verib.
AZƏRTAC xəbər verir ki, bu barədə Monterey dairəsinin Fövqəladə Hallar Departamenti məlumat yayıb. Məlumata görə, yanğın səbəbindən elektrik stansiyasının yaxınlığındakı bir neçə rayonda təxliyə elan olunub. Yerli hakimiyyət orqanları evlərində qalan sakinlərə pəncərə və qapıları, həmçinin havalandırma sistemlərini bağlamağı tövsiyə edib.
“Santa Cruz Sentinel” qəzeti yazır ki, yanğının baş verdiyi obyekt dünyanın on minlərlə litium batareyası ilə təchiz olunan ən böyük akkumulyator elektrik stansiyalarından biridir.
Qeyd edək ki, yanvarın 7-də Kaliforniyanın Los-Anceles dairəsində başlayan meşə yanğınları 16 min hektar sahəni əhatə edib. Təbii fəlakət nəticəsində azı 25 nəfər həlak olub, 12 mindən çox bina, o cümlədən məşhur şəxslərin dəbdəbəli malikanələri yanaraq kül olub. Meteoroloqlar yanğının sürətlə yayılmasına quru və küləkli havanın səbəb olduğunu bildiriblər.
Bölmənin digər xəbərləri
