Keçən il qadınların orta aylıq əməkhaqqı dövlət sektorunda 646,5 manat olub
Bakı, 25 oktyabr, AZƏRTAC
Azərbaycan Respublikasında 2022-ci il üzrə orta aylıq əməkhaqqı 839,4 manat olub. İlkin məlumatlara görə qadınların orta aylıq əməkhaqqı (558 manat) kişilərin orta aylıq əməkhaqqının (962,7 manat) 68,1 faizini təşkil edib.
AZƏRTAC xəbər verir ki, bu, oktyabrın 25-də Milli Məclisdə müzakirə edilən Azərbaycan Respublikası Ailə, Qadın və Uşaq Problemləri üzrə Dövlət Komitəsinin 2022-ci il üzrə hesabatında əksini tapıb.
Bildirilib ki, 2015-ci ildə bu nisbət 53,9 faiz (müvafiq olaraq 310,5 manat və 576,0 manat), 2021-ci ildə isə 64,8 faiz (müvafiq olaraq 552,2 manat və 851,7 manat) təşkil edib. Gender bərabərliyinin təminatı baxımından bu sahədə də müsbət dinamika müşahidə olunur.
Rəsmi statistik məlumatlara əsasən 2022-ci ildə qadınların orta aylıq əməkhaqqı dövlət sektorunda 646,5 manat, qeyri-dövlət sektorunda isə 674,8 manat olub ki, bu da kişilərin həmin sektorlarda orta aylıq əməkhaqlarının (958,9 manat və 965,5 manat) müvafiq olaraq 67,4 faiz və 70 faiz təşkil edir. 2021-ci ildə bu rəqəm dövlət sektorunda çalışan qadınlar üçün 532,2 manat, qeyri-dövlət sektorunda çalışanlar üçün 601,2 manat olub.
Bölmənin digər xəbərləri
