KƏLBƏCƏRİN TƏHSİL İŞÇİLƏRİ YENİ DƏRS İLİNƏ CİDDİ HAZIRLAŞMIŞLAR
AZƏRTAC-ın müxbiri xəbər verir ki, Kəlbəcər rayon təhsil işçilərinin ənənəvi avqust müşavirəsi keçirilmişdir. Müşavirədə ümummilli liderimiz Heydər Əliyevin xatirəsi ehtiramla yad edildikdən sonra rayon təhsil şöbəsinin müdiri Vaqif Məhəmmədovun 2003-2004-cü tədris ilinin yekunları və yeni dərs ilinə hazırlıq barədə məruzəsi dinlənilmişdir. Sonra məruzə ətrafında çıxışlar olmuşdur. Qeyd edilmişdir ki, respublikamızın 56 şəhər və rayonunda məskunlaşan Kəlbəcərin təhsil işçiləri hər il uğurlu nəticələrə nail olurlar. Təkcə bu il orta məktəbi bitirən şagirdlərdən 200 nəfəri ali və orta ixtisas məktəblərinə qəbul olunmuşdur. Yeni dərs ilinə ciddi hazırlaşan rayon təhsil işçiləri bu uğurları davam etdirməyi qarşılarına məqsəd qoymuşlar. 11 min şagirdin təlim-tərbiyəsi ilə məşğul olan 2024 müəllim üçün demək olar, hər bir şərait yaradılmışdır.
Rayonun 67, 75 və 126 nömrəli məktəbləri yeni binalara köçürülmüşdür. 11 məktəbdə əsaslı təmir işləri aparılmış və bütün tədris ocaqları lazımi avadanlıqla təchiz edilmişdir. Axırda konfrans iştirakçıları Prezident İlham Əliyevə müraciət qəbul etmişlər.
Bölmənin digər xəbərləri
