Kiçik ürəklərdə böyük arzular: 1 saylı Uşaq evindən REPORTAJ VİDEO
Bakı, 14 oktyabr, Aytac Haqverdiyeva, AZƏRTAC
Hər uşağın ürəyində fərqli bir dünya var, bəzən bu dünya rənglərə boyanır, bəzən xəyallara, bəzən də səssiz bir istəyə çevrilir.
AZƏRTAC-ın komandası bu dəfə Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin 1 saylı Uşaq evi sosial xidmət müəssisəsində böyüyən uşaqları ziyarət edərək onların həyat hekayələrini dinləyib. Bu uşaqların hekayələri yalnız keçmişin bir parçası deyil, həm də gələcəyə uzanan ümidlərin ifadəsidir. Hər biri öz arzusu, bacarığı və həyat sevgisi ilə seçilir. Kimisi fırçası ilə rənglərə can verir, kimisi gələcəyin həkimi, müəllimi, jurnalisti olmaq üçün ilk addımlarını atır.
Uşaqlıq arzularından gələcəyin reallığına
İlk həmsöhbətimiz 20 yaşlı Ayla Eynullayevadır. O, 2021-ci ildən bu uşaq evində yaşayır və o gündən bəri rəsmlə nəfəs aldığını deyir: “Bura gəldiyim gündən rəsmlə məşğulam. Ən çox heyvanları, mənzərələri və müxtəlif mövzuları çəkməyi sevirəm. Dördüncü sinfə qədər Azərbaycan Pedaqoji Kollecində təhsil almışam, daha sonra Rəssamlıq Akademiyasında oxumaq şansı əldə etmişəm. Rəsm mənim üçün sadəcə məşğuliyyət deyil, həm də rahatlıq və sevinc mənbəyidir. Gələcəkdə tanınmış rəssam və rəsm müəllimi olmaq istəyirəm”.
Əkiz bacılar Mələk və Məleykə 11 yaşındadırlar. Onlar 220 nömrəli məktəbdə təhsil alır və hazırda xalça toxuma ilə məşğuldurlar. “Xalça toxuma çox gözəl sənətdir, bu işlə məşğul olmağı sevirik”, - deyirlər bacılar.
Bu sənət onlar üçün həm səbrin, həm də gözəlliyin dərsidir. Hər ilmədə bir arzu, bir ümid toxunur.
Kiçik arzular, böyük ümidlər
Beşyaşlı Zeynəb böyüyəndə həkim olmaq istəyir: “Mənim adım Zeynəbdir. 5 yaşım var. Böyüyəndə həkim olmaq istəyirəm”. Onun bu arzusu xeyirxahlığın sadə, amma güclü ifadəsidir.
Beşyaşlı Nərmin isə müəllim olmağı arzulayır: “Mənim adım Nərmindir. Mənim 5 yaşım var. Böyüyəndə müəllim olmaq istəyirəm”.
Dördyaşlı Miryusifin arzusu isə səmalara uzanır. O, təyyarə sürmək istəyir.
Altıyaşlı Əziz riyaziyyatı çox sevir və böyüyəndə deputat olmağı planlaşdırır: “Mənim adım Əzizdir, 6 yaşım var. Ən sevdiyim dərs riyaziyyatdır. Məktəbi və dostlarımı çox sevirəm. Böyüyəndə deputat olmaq istəyirəm”.
Gələcəyin jurnalisti
Aysu Namazova, 1 saylı Uşaq evinin sakini, 220 nömrəli məktəb-liseyin 11-ci sinif şagirdidir. O, jurnalist olmaq arzusundadır və bu istiqamətdə ilk uğurlarını da qazanıb: “Ulu Öndər Heydər Əliyevin 102-ci ildönümünə həsr olunmuş müsabiqədə ikinci yer tutmuşam. Jurnalistikaya böyük marağım var. Gələcəkdə AZƏRTAC-da işləmək və peşəkar jurnalist olmaq istəyirəm”.
Sosial xidmət müəssisələrində uşaqların sayında azalma müşahidə olunur
Bu uşaqlar bir ulduz kimidir, parlaq və bənzərsiz. Onlar üçün “uşaq evi” ümidin, paylaşmağın və özünü tapmağın ünvanıdır. Bəziləri fırça ilə, bəziləri sözlə, bəziləri elm və sənətlə gələcəyə doğru addımlayır. Ortada isə eyni bir duyğu var: inanmaq, sevmək və ümidsizliyə qapılmamaq.
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin məlumatına görə, hazırda ölkədə 6 uşaq evi sosial xidmət müəssisəsi fəaliyyət göstərir - 3-ü Bakı şəhərində, 1-i Gəncə, 1-i Lənkəran, 1-i isə Şəkidə yerləşir. Bununla yanaşı, Bakı və Lənkəranda ailə tipli kiçik qrup evləri də fəaliyyət göstərir.
Hazırda bu müəssisələrdə 459 uşaq yaşayır. Agentliyin həyata keçirdiyi reinteqrasiya tədbirləri nəticəsində uşaqların öz ailələrinə qaytarılması prosesi aparılır. Bununla yanaşı “Himayədar ailə” qayğı modeli də valideyn himayəsindən məhrum olmuş uşaqların ailə mühitində yaşamasına xidmət edir. Bu səbəbdən uşaq evlərindəki uşaqların sayında azalma müşahidə olunur. İndiyədək bu model çərçivəsində 53 uşaq himayədar ailəyə verilib. Onlardan 32-si qız, 21-i oğlandır.
...Bu uşaqların arzuları kiçik görünə bilər, amma onların gücü böyükdür. Hər arzu gələcəyə atılmış bir ümiddir. Onlar sabahın rəssamı, müəllimi, həkimi, jurnalisti ola bilərlər. Əsas olan odur ki, bu xəyallar gerçəyə çevrilsin və heç bir uşaq arzularını təkbaşına daşımasın.
Uşaqların hər birinin arzusu gələcəyə açılan bir qapıdır. Onların inamla addımladığı bu yolda dövlət dəstəyi, cəmiyyətin qayğısı və sevgi dolu münasibət sabahın uğurlarını formalaşdırır. Kiçik arzular böyük gələcəklərin başlanğıcıdır.
Bölmənin digər xəbərləri
