Kiyev “Ştaynmayer formulu”nun razılaşdırılması barədə məktubu dərc edib
Bakı, 2 oktyabr, AZƏRTAC
Kiyevin Donbas münaqişəsinin nizamlanmasına dair kontakt qrupundakı nümayəndəsi Leonid Kuçmanın “Ştaynmayer formulu”nun razılaşdırılması barədə məktubu dərc olunub.
AZƏRTAC Ukrayna KİV-lərinə istinadla xəbər verir ki, ATƏT-in xüsusi nümayəndəsi Martin Saydikə ünvanlanan məktubun surətini Leonid Kuçmanın mətbuat katibi Darya Olifer “Facebook” sosial şəbəkəsində yerləşdirib.
Məktubda 2019-cu il sentyabrın 11-də Ukrayna, Almaniya, Fransa və Rusiya rəhbərləri müşavirlərinin razılaşdırdığı formulun mətninin Kiyev tərəfindən qəbul edildiyi bildirilir. Formul Donetsk və Luqansk vilayətlərinin Kiyevin nəzarətində olmayan ərazilərində Ukrayna qanunlarına müvafiq seçkilərin keçirilməsini nəzərdə tutur. Bundan sonra, ATƏT müşahidəçiləri seçkiləri təşkilatın standartlarına uyğun saydığı təqdirdə Donbasın xüsusi statusu barədə qanun qüvvəyə minəcək.
Qeyd edək ki, formul Almaniya Prezidenti, ATƏT-in sabiq sədri və AFR-in sabiq Xarici İşlər naziri Frank-Valter Ştaynmayer tərəfindən təklif olunub.
Bölmənin digər xəbərləri
