DÜNYA
Kiyevə raket qalığının düşməsi nəticəsində ölən və xəsarət alanlar var
![Kiyevə raket qalığının düşməsi nəticəsində ölən və xəsarət alanlar var](/files/2023/1/1200x630/16747286915013859622_1200x630.jpg)
Kiyev, 26 yanvar, AZƏRTAC
Rusiya raketi Kiyevin Qoloseyevski rayonunda qeyri-yaşayış binasına düşüb. Hücum nəticəsində ölən və xəsarət alanlar var.
AZƏRTAC xəbər verir ki, bu barədə Kiyev şəhər meri Vitali Kliçko məlumat verib.
"Qoloseyevski rayonundakı qeyri-yaşayış binalarına raketin düşməsi nəticəsində bir nəfərin öldüyü və iki nəfərin yaralandığı barədə məlumat var. Yaralılar həkimlər tərəfindən xəstəxanaya yerləşdirilib", - deyə Kliçko bildirib.
Eyni zamanda, Kiyev Şəhər Hərbi Administrasiyası hava hücumundan müdafiə sisteminin vurduğu Rusiya raketinin bir hissəsinin Qoloseyevski rayonuna düşdüyünü açıqlayıb.
İlkin məlumata görə, raket hücumu nəticəsində 55 yaşlı kişi ölüb.
Qeyd edək ki, Kiyev Şəhər Hərbi Administrasiyasının rəhbəri Sergey Popkonun daha öncə yaydığı məlumata görə, yanvarın 26-da genişmiqyaslı hücum zamanı Rusiya hərbçiləri Kiyevə doğru 15 raket atıblar. Bütün hava hədəfləri hava hücumundan müdafiə qüvvələri tərəfindən məhv edilib.
Emil Hüseynli
AZƏRTAC-ın xüsusi müxbiri
Kiyev