QAN YADDAŞI
Köln şəhərində 20 Yanvar faciəsinin ildönümü ilə bağlı tədbir keçirilmişdir
Berlin, 22 yanvar (AZƏRTAC). Alman Azərbaycan Mədəniyyət Evi Köln şəhərində “20 Yanvar tariximizin unudulmaz səhifəsidir” mövzusunda tədbir keçirmişdir.
Tədbirdə Almaniyada fəaliyyət göstərən siyasi partiyaların, qeyri-hökumət təşkilatlarının nümayəndələri, Azərbaycan və Türkiyə diasporunun üzvləri, tələbələr iştirak etmişlər.
Mədəniyyət Evinin icraçı direktoru Rəşad Xasayoğlu çıxış edərək 20 Yanvar qətliamının tarixi haqqında danışmışdır. O, xalqımıza qarşı törədilmiş belə faciələrə beynəlxalq miqyasda siyasi-hüquqi qiymət verilməsi üçün səylərin artırılmasının vacibliyini qeyd etmişdir.
Almaniyanın Yaşıllar Partiyasının Köln şəhərindən deputatı Arif Ünal bildirmişdir ki, Azərbaycanın qəhrəman oğul və qızları yanvarın 20-də azadlıq və müstəqillik arzularını hətta canlarından belə üstün tutaraq şəhid oldular.
“Bochum” Azərbaycan Cəmiyyətinin sədri Rasim Sadıxov həmin gecə yaşadığı o dəhşətli anları tədbir iştirakçıları ilə bölüşmüşdür. O demişdir ki, 20 Yanvar faciəsi yüksək mənəvi ruha malik Azərbaycan xalqının mübarizə əzmini qıra bilmədi. Azərbaycan müstəqilliyini bərpa etdi.
Mərasimdə şəhidlərin xatirəsinə ehsan süfrəsi açılmışdır.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
