Lənkəranda 20 Yanvar şəhidlərinin ailə üzvləri ilə görüş keçirilmişdir
Lənkəran, 18 yanvar (AZƏRTAC). Yanvarın 18-də Lənkəran Şəhər İcra Hakimiyyətində 20 Yanvar şəhidlərinin ailə üzvləri ilə görüş keçirilmişdir.
AZƏRTAC xəbər verir ki, tədbirdə 20 Yanvar faciəsi qurbanlarının xatirəsi bir dəqiqəlik sükutla yad edilmişdir.
Görüşdə 1990-cı il yanvarın 19-dan 20-nə keçən gecə sovet qoşunlarının törətdiyi qətliamdan söhbət açılaraq qeyd olunmuşdur ki, bu hadisə SSRİ-nin o vaxtkı rəhbəri Mixail Qorbaçovun tapşırığı ilə Azərbaycan xalqına qarşı törədilən misli görünməmiş qanlı faciə, terror və soyqırımı idi.
Bildirilmişdir ki, yalnız ulu öndər Heydər Əliyevin Azərbaycanda ikinci dəfə hakimiyyətə qayıdışından sonra bu qanlı faciəyə hüquqi və siyasi qiymət verilmişdir.
“20 Yanvar” Cəmiyyəti Lənkəran rayon şöbəsinin sədri Yusif Abdullayev, şəhid ailələrinin üzvləri onlara və əlillərə göstərilən qayğıya görə Azərbaycan Prezidenti İlham Əliyevə minnətdarlıqlarını bildirmişlər.
Görüşdə şəhid ailələrinə və əlillərə maddi yardımlar edilmişdir.
Bölmənin digər xəbərləri
