Macar nəşri: Bu gün Aİ korrupsiyaçılara qarşı qərar qəbul edəcək
Budapeşt, 20 may, AZƏRTAC
Bu gün Avropa İttifaqı (Aİ) gələcəkdə korrupsiyaçı məmurların əllərini “kəsmək”lə bağlı qərar verir.
AZƏRTAC xəbər verir ki, Macarıstanın “index.hu” nəşrində bu sərlövhə altında məqalə dərc olunub.
Yazıda deyilir ki, Avropa Parlamentində Etika komitəsinin yaradılması ilə bu sahədə dönüş yaranıb. Əgər faktlar aşkara çıxsa, bu struktur təkcə Avropa Parlamentinin deyil, digər Aİ qurumlarının da fəaliyyətini araşdırmalı olacaq. Onun vəzifəsi Avropa Parlamenti, Avropa Komissiyası və üzv ölkələrin nazirlərindən ibarət Avropa İttifaqı Şurası da daxil olmaqla bir sıra Aİ qurumlarının işinə nəzarət etmək olacaq.
Avropa Parlamenti hələ 2021-ci ilin sentyabrında belə bir qurumun yaradılmasına çağırıb və bu, “Qatargate” qalmaqalı başlayandan sonra geniş vüsət alıb. Bununla belə, onun yaradılmasına sağ mərkəzçi Avropa Xalq Partiyası (EPP) və sağçı siyasi qruplar mane olub və indi komitənin yaradılmasına dair səsvermə mənfi olarsa, tabuta son mismar vurula bilər və yeni struktur hələ fəaliyyətə başlamazdan əvvəl işini faktiki olaraq bitirə bilər.
Səsvermə əvvəlcə Avropa Parlamentinin Konstitusiya Məsələləri Komitəsində keçiriləcək.
Siyasi qruplar onun spesifik səlahiyyətləri və funksiyaları barədə razılığa gələ bilməyib və bu səbəbdən də uzun müddət məsələ açıq qalıb.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
