Macarıstanda seçkilər ərəfəsində siyasi fəallıq artır: regionlarda FİDES, iri şəhərlərdə müxalifət öndədir
Budapeşt, 23 yanvar, AZƏRTAC
Macarıstanda aprel ayında keçiriləcək parlament seçkiləri ərəfəsində siyasi partiyalar fəallaşıb.
AZƏRTAC xəbər verir ki, həm hakim FİDES partiyası, həm də müxalif qüvvələr ölkə üzrə intensiv kampaniya mərhələsinə daxil olub, seçicilərlə görüşlərin, regional səfərlərin və ictimai tədbirlərin sayı xeyli artıb.
Son rəy sorğularının nəticələrinə görə, Baş nazir Viktor Orbanın rəhbərlik etdiyi FİDES partiyası əsasən ölkənin əyalət və kənd bölgələrində güclü dəstəyə malikdir. Məhz bu regionlarda seçicilər hakim partiyanın sosial siyasətini, milli maraqlara əsaslanan xəttini və sabitlik mesajlarını üstün tutur. Bununla yanaşı, iri şəhərlərdə, xüsusilə Budapeştdə və böyük sənaye mərkəzlərində müxalif qüvvələrin mövqeləri nisbətən güclənib.
Sosioloji tədqiqatlar göstərir ki, şəhər seçiciləri daha çox iqtisadi islahatlar, korrupsiya ilə mübarizə və Avropa İttifaqı ilə münasibətlər mövzusuna diqqət yetirir. Analitiklərin fikrincə, seçkilərin nəticəsi regionlar və böyük şəhərlər arasındakı bu siyasi fərqin hansı tərəfin xeyrinə dəyişəcəyindən asılı olacaq.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
