Macarıstanın nüfuzlu nəşrində 20 Yanvar faciəsinə həsr olunmuş tədbirlə bağlı məlumat dərc edilmişdir
Budapeşt, 24 yanvar (AZƏRTAC). Yanvarın 23-də Macarıstanın ingilis dilində çıxan nüfuzlu “Daily News Hungary” nəşrində Azərbaycanın Macarıstandakı səfirliyinin dəstəyi ilə keçirilmiş, 20 Yanvar faciəsinin 24-cü ildönümünə həsr olunmuş tədbir barədə məlumat yerləşdirilmişdir (http://dailynewshungary.com/the-embassy-of-azerbaijan-in-hungary-held-commemorative-event-on-black-january-tragedy).
Məlumatda deyilir ki, tədbir şəhidlərin xatirəsini bir dəqiqəlik sükutla yad etməklə başlamışdır. Çıxış edənlər həmin günlər Bakıda və Azərbaycanın digər şəhərlərində baş vermiş dəhşətli hadisələrdən danışmışlar. Natiqlər qeyd etmişlər ki, sovet qoşunları xalqın müstəqillik və respublikanın ərazi bütövlüyü uğrunda dinc hərəkatını boğmaq üçün paytaxta yeridilmişdir. Müxtəlif millətlərə, yaş kateqoriyalarına və peşələrə mənsub vətəndaşlar tankların altında əzilmiş, küçələrdə və hətta pəncərədən baxarkən güllələnmişlər. Bildirilmişdir ki, bu faciəli tarix insanların şüurunda dönüş nöqtəsi olmuşdur. Həmin gündən aydın olmuşdur ki, kommunist Kremli Azərbaycanı birdəfəlik itirmişdir.
Məqalədə sovet rejiminin Bakıda törətdiyi cinayətlə Budapeştdə, Praqada, Tbilisidə və Vilnüsdə baş vermiş oxşar hadisələrin müqayisəsi aparılmışdır.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
