Maia Bitadze: Regional sabitlik və iqtisadi artım üçün real fürsət yaranır
Tbilisi, 18 noyabr, AZƏRTAC
Cənubi Qafqaz regionunda və dünyada təhlükəsizlik problemləri iqtisadi əlaqələrin əhəmiyyətinə və beynəlxalq əməkdaşlığa mühüm təsir edən amillərdəndir. Gürcüstan bunun üçün ATƏT və digər beynəlxalq təşkilatlarla əməkdaşlıq etməyə hazırdır.
AZƏRTAC xəbər verir ki, bu sözləri Gürcüstan Parlamentinin Ətraf mühit və təbii sərvətlər komitəsinin sədri Maia Bitadze İstanbulda ATƏT Parlament Assambleyasının 23-cü sessiyasındakı çıxışı zamanı bildirib.
“Səmimi qonaqpərvərliyinə görə Türkiyəyə və bizi İstanbulda bir araya gətirdiyi üçün ATƏT Parlament Assambleyasına təşəkkürümü bildirmək istərdim. Builki mövzu “Dialoq vasitəsilə çoxtərəfli əməkdaşlığın yenilənməsi”dir, bu da çox aktual məsələdir. Qlobal ticarət, əlaqə və davamlı inkişafın bir daha sülhün əsası olduğu bir vaxtda parlamentarilər kimi bizim məsuliyyətimiz daha aydındır”, - deyə M.Bitadze vurğulayıb.
Bəzi qüvvələrin Gürcüstanda öz siyasi məqsədləri üçün ATƏT-in vasitəçiliyindən istifadə etmək istədiklərini vurğulayan komitə sədri deyib: “Bu, ATƏT-in öz prinsiplərinə ziddir. Ona görə ki, yalnız qərəzsiz ATƏT sabitliyi və dialoqu qoruya bilər”.
Maia Bitadzenin sözlərinə görə, Gürcüstan öz ölçüsündən qat-qat artıq olan dəyərləri təcəssüm etdirir. Azadlıq, suverenlik, sülh və birlik bizim əsas prinsiplərimizdir. Komitə sədri deyib ki, Gürcüstan Avropa və Asiyanın kəsişməsində yerləşən ölkə kimi etibarlı tərəfdaş və mühüm mərkəz rolunu dərinləşdirməyə, təhlükəsiz ticarəti, davamlı təchizat zəncirlərini və getdikcə mürəkkəbləşən dünyada paylaşılan rifahı təşviq etməyə hazırdır.
O bildirib ki, Gürcüstan Ermənistanla Azərbaycan arasında sülh prosesində irəliləyişi alqışlayır. “Regional sabitlik və iqtisadi artım üçün real fürsət təqdim edilir. Gürcüstan tarixi İpək Yolu ölkəsi kimi neytral, etibarlı tərəfdaş olaraq qalmağa, daha geniş regionumuzda davamlı əlaqə və dayanıqlılığı inkişaf etdirməyə hazırdır. Faktlar öz sözünü deyir. Gürcüstanın Orta Dəhlizdəki rolu sürətlə genişlənir. Təkcə 2024-cü ildə müasir dəmir yollarının həcmi 6 faiz artıb. Tutumunun sürətlə artırılması, eyni zamanda, yeni magistralların, hava limanlarının və dəniz limanlarının layihələndirilməsi və tikintisi, sualtı kabel layihəsinin strateji potensialı ilə birlikdə onlar Gürcüstanın strateji iqtisadi təhlükəsizliyinin əsasını təşkil edir, Avropa və Asiya arasında təhlükəsiz, etibarlı marşrut təmin edir, geosiyasi riskləri azaldır, daxili sərmayəçiliyi gücləndirir”, - deyə Bitadze vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
