MAKEDONİYADA “BALKAN-QAFQAZ” MÖVZUSUNDA SEMİNAR KEÇİRİLMİŞDİR

28.12.2005 [11:46]
Çap et
A⁺ A^-

Azərbaycan Respublikasının insan hüquqları üzrə müvəkkili aparatının beynəlxalq əlaqələr sektorunun müdiri Munir Məmmədov Makedoniya Respublikasının Ohrid şəhərində İcmaların İnkişafı İnstitutu, Avropa Şurası və Soros Fondu tərəfindən təşkil olunan “Balkan-Qafqaz” mövzusunda seminarda iştirak etmişdir. Seminar Avropa Şurasının Demokratik Liderlik Proqramı çərçivəsində həyata keçirilmişdir. Tədbirdə Cənubi Qafqaz və Balkan ölkələrindən 30-dək gənc nümayəndə iştirak etmişdir.

Seminarda Cənubi Qafqaz regionunun nümayəndələri təmsil etdikləri ölkələr üzrə təqdimatla çıxış etmiş, müzakirələr aparmışlar. Müzakirələr Qafqazda mövcüd münaqişələrə, əsasən, Dağlıq Qarabağ probleminə həsr edilmişdir.

Tədbirdə “Keçid dövrünü yaşayan ölkələrdə sosial dəyişikliklər”, “Mədəniyyətlərarası dialoq”, “Avropaya inteqrasiya prosesi və etnik qruplar arasında münasibətlər” və “Vasitəçilik bacarıqları” üzrə məruzələr dinlənilmiş, qruplarda iş aparılmışdır.

Xatırladaq ki, 2006-cı ildə Balkan-Qafqaz proqramı çərçivəsində hər iki bölgədə regional mərkəzlər yaradılacaqdır.