Malayziya mətbuatında 28 May – Respublika Günü ilə bağlı geniş materiallar dərc olunub
Kuala Lumpur, 26 may, AZƏRTAC
Malayziyanın aparıcı mətbuat orqanlarında 28 May - Respublika Günü ilə əlaqədar geniş materiallar dərc olunub.
AZƏRTAC xəbər verir ki, Malayziyanın ən böyük xəbər istehsalçısı olan BERNAMA Milli İnformasiya Agentliyinin saytında və “Utusan Malaysiya” qəzetində müəllif yazıları dərc edilib.
BERNAMA agentliyi tərəfindən “Azərbaycan Respublika Gününün 103-cü ildönümünə yeni qürur hissi ilə baxır” sərlövhəli məqalədə ölkəmizin uzun illər işğal altında qalan torpaqlarının azad edilməsindən sonra qeyd olunan ilk Respublika Gününün bütün azərbaycanlılar tərəfindən xüsusi sevinclə qarşılandığı vurğulanıb. Məqalənin müəllifi Rajaminakam Raviçandra bildirib ki, 1993-cü ilədək təlatümlü dövrlər keçirən müasir Azərbaycan dövlətçiliyi ulu öndər Heydər Əliyevin hakimiyyətə gəlməsi ilə, eləcə də 2003-cü ildən sonra Prezident İlham Əliyevin rəhbərliyi altında çətin günləri geridə qoyub, sabitlik və tərəqqi mərhələsinə keçib.
Müəllif məqalədə Azərbaycanın Malayziyadakı səfiri Qaley Allahverdiyevlə müsahibəyə də istinad edib. Azərbaycan diplomatı qeyd edib ki, 30 illik işğaldan sonra torpaqlarımızın azad edilməsi ilə xalqımız dinc yaşayış dövrünə qədəm qoyub, öz növbəsində Azərbaycan hökuməti ölkənin sosial-iqtisadi inkişafı üçün yeni layihələr həyata keçirməyə və daha çox xarici investisiya cəlb etmək üçün tədbirlərə start verib.
Səfir Q.Allahverdiyev Azərbaycan Prezidenti İlham Əliyevə istinad edərək, işğaldan azad olunmuş regionlarda milli-mədəni irsin mühafizəsi ilə yanaşı, “Ağıllı şəhər”, “Ağıllı kənd” konsepsiyalarının, eləcə də yaşıl enerji praktikasının tətbiq olunacağını nəzərə çatdırıb, dost Malayziyadan təşəbbüskar sərmayədarlar üçün səmərəli investisiya imkanlarının yarandığını vurğulayıb.
Q.Allahverdiyev əlavə edib ki, beynəlxalq və regional layihələr üzrə geniş təcrübəyə malik olan Azərbaycan öz qonşuları ilə davamlı əməkdaşlıq və dinc münasibətlər prinsipinə birmənalı surətdə sadiqdir. Səfir söyləyib: “Azərbaycan Prezidenti, Rusiya Federasiyasının Prezidenti və Ermənistanın baş naziri arasında imzalanmış üçtərəfli Bəyanatdan sonra Cənubi Qafqaz regionundakı qonşuluq mühitində yeni səhifə açılıb”.
Məqalədə, həmçinin Azərbaycanın hazırda Qoşulmama Hərəkatına (QH) sədrlik etdiyi, təşkilatın sədri, Prezident İlham Əliyevin COVID-19 pandemiyasına qarşı peyvəndlərin ədalətli bölgüsü ilə bağlı məsələni beynəlxalq səviyyədə qaldırdığı, bu istiqamətdə mühüm addımlar atdığı vurğulanıb.
Respublika Günü ilə bağlı növbəti məqalə Malayziyanın ən çox tiraja malik malaydilli nəşri “Utusan Malaysia”da dərc olunub. Beynəlxalq xəbərlər üzrə müxbir Taqib Şaker tərəfindən qələmə alınmış məqalədə Azərbaycanın müsəlman dünyasında ilk parlamentli və dünyəvi demokratik dövlət təsis etdiyi, Azərbaycan Xalq Cümhuriyyətinin iki ildən az yaşamasına baxmayaraq, bir sıra islahatlarla mütərəqqi dövlətçilik nümunəsi yaratdığı diqqətə çatdırılıb. Azərbaycan Xalq Cümhuriyyətinin XX əsrin sonunda yenidən istiqlaliyyətinə qovuşan müstəqil Azərbaycanın şərəfli tarixində böyük mərhələnin əsasını qoyduğu, bu dəyərli irsə hörmət əlaməti olaraq azərbaycanlıların hər il 28 may tarixini Respublika Günü kimi qeyd etdiyi vurğulanıb.
Vüqar Ağayev
AZƏRTAC-ın xüsusi müxbiri
Kuala Lumpur
Bölmənin digər xəbərləri
