Malik Həmzəyev: Şəhid ailələrinə və müharibə iştirakçılarına diqqət və qayğı mənəvi borcumuzdur
Qax, 9 mart, Mustafa Dadaşov, AZƏRTAC
Torpaqlarımızın erməni işğalçılarından azad edilməsi uğrunda gedən döyüşlər zamanı canlarından keçən şəhidlərimizin ailə üzvlərinin, eləcə də müharibə iştirakçılarının, döyüşlərdə yaralananların sosial problemlərinin həlli dövlət başçımızın daim diqqət mərkəzindədir. Bu baxımdan, “Yerli icra hakimiyyətləri haqqında Əsasnamə”nin təsdiq edilməsi barədə” Azərbaycan Respublikası Prezidentinin 2012-ci il 6 iyun tarixli Fərmanında dəyişiklik edilməsi haqqında Prezident İlham Əliyevin cari il yanvarın 7-də imzaladığı Fərmana əsasən, şəhər və rayon icra hakimiyyəti başçıları aparatlarında “Vətən müharibəsi iştirakçıları və şəhid ailələri ilə işin təşkili şöbəsi”nin yaradılması bu kateqoriyadan olan insanlara, ailələrə dövlətimiz tərəfindən göstərilən diqqət və qayğının daha bir bariz nümunəsidir.
Bu sözləri AZƏRTAC-ın bölgə müxbirinə müsahibəsində Qax Rayon İcra Hakimiyyəti başçısı aparatında yeni yaradılan Vətən müharibəsi iştirakçıları və şəhid ailələri ilə işin təşkili şöbəsinin müdiri Malik Həmzəyev bildirib.
Qeyd edək ki, yeni yaradılan şöbəyə rəhbər təyin edilən Malik Həmzəyev şanlı zəfərlə başa çatan Vətən müharibəsinin iştirakçısı, ehtiyatda olan zabitdir. O, Qubadlının işğaldan azad edilməsi uğrunda gedən döyüşlərdə iştirak edib, “Qubadlının azad olunmasına görə” medalı ilə təltif olunub.
Şöbə müdiri bildirib ki, 44 gün davam edən Vətən müharibəsində Qax rayonundan 400-dən çox hərbçi və könüllü döyüşlərdə iştirak edib, onlardan 29-u şəhidlik zirvəsinə yüksəlib. Cəbhə bölgəsində gedən hərbi əməliyyatlar zamanı 91 nəfər yaralanıb. Hazırda onların sağlamlıqlarının bərpası istiqamətində zəruri tədbirlər davam etdirilir.
Yeni yaradılan şöbənin qarşısında duran əsas vəzifənin bu kateqoriyadan olan vətəndaşlara diqqət göstərmək, onların problemlərini araşdırmaq və həllini nəzarətdə saxlamaq olduğunu vurğulayan Malik Həmzəyev deyib: “Respublikamızın hər yerində olduğu kimi, Qax rayonunda da şəhid ailələrinin, döyüşlərdə yaralanan qazilərimizin, müharibə iştirakçılarının problemlərinin həllinə xüsusi həssaslıqla yanaşılır. Rayonun rəhbər şəxsləri, ayrı-ayrı əmək kollektivlərinin nümayəndələri torpaqlarımızın erməni işğalçılarından azad edilməsi uğrunda gedən döyüşlərdə canlarını qurban vermiş şəhidlərimizin ailələrini, yaralanan şəxsləri mütəmadi olaraq evlərində ziyarət edir, onlarla həmsöhbət olur, problemləri ilə maraqlanır, maddi və mənəvi dəstək olurlar. Şöbə olaraq, indidən sonra bu işlərdə biz də yaxından iştirak edəcəyik. Bu kateqoriyadan olan şəxslərin siyahısı tam dəqiqləşdirilib və artıq yerlərdə onlarla görüşlərin keçirilməsinə də başlamışıq. Görüşlərdə onların müraciətləri diqqətlə dinlənilir və problemləri qeydə alınır. Bu insanların qarşılaşdıqları problemlərin, o cümlədən məşğulluq məsələlərinin qısa müddətdə həlli üçün bütün zəruri işlər görüləcək. Erməni faşizmi üzərində şanlı zəfərin əldə edilməsində böyük payı olan bu şəxslərin heç biri diqqətdən kənarda qalmayacaq”.
Şöbə müdirinin məlumatına görə, ümumiyyətlə, torpaqlarımızın erməni işğalından azad edilməsi uğrunda gedən Birinci Qarabağ savaşında, eləcə də Vətən müharibəsində Qax rayonu 137 şəhid verib, əvvəlki müharibədə 28 nəfər itkin düşüb. Şəhid ailələrinin və müharibə əlillərinin mənzil-məişət şəraitini yaxşılaşdırmaq üçün ötən illərdə rayonda 68 mənzilli 3 yaşayış binası, 11 fərdi ev tikilib istifadəyə verilib. Hazırda bu kateqoriyadan olan vətəndaşlar üçün 5 fərdi evin tikintisi davam etdirilir.
Vətən müharibəsində iştirak etməsindən çox qürurlu olduğunu vurğulayan Malik Həmzəyev deyib: “İşğal altında olan torpaqlarımızın azad olunmasını 30 ildir ki, gözləyirdik. Müzəffər Ali Baş Komandan İlham Əliyevin, şanlı ordumuzun sayəsində nəhayət ki, buna nail olduq. Bu tarixi Qələbəyə görə Müzəffər Ali Baş Komandanımıza dərin minnətdarlığımızı bildirir, şəhidlərimizin ruhu qarşısında baş əyirik. Şəhidlərimizin ailələrinə və müharibə iştirakçılarına diqqət və qayğı mənəvi borcumuzdur”.
Bölmənin digər xəbərləri
