Malik Həsənov: Hər günümüz Azərbaycanın tarixinə mühüm uğurlarla yazılır
Bakı, 6 aprel, AZƏRTAC
2018-ci il aprelin 11-də keçirilən prezident seçkilərindən ötən 4 ildə Azərbaycanın ayrı-ayrı sahələrdə qazandığı uğurlara diqqət yetirsək, miqyasının geniş və qürurverici olduğunu böyük əminliklə qeyd edə bilərik. Dövlətimizin başçısı İlham Əliyevin rəhbərliyi ilə həyata keçirilən təkmil islahatlar, yenilikləri özündə əks etdirən və gələcəyə hesablanmış siyasət hər bir hədəfə yüksək səviyyədə nail olmağa geniş imkanlar açır. Ümumilikdə dövlətimizin başçısı İlham Əliyevin Prezident kimi fəaliyyətə başladığı gündən əsas hədəf ulu öndər Heydər Əliyevin siyasi kursunu uğurla davam etdirərək Azərbaycanı daha güclü, qüdrətli dövlətə çevirmək, ərazi bütövlüyümüzü bərpa etmək idi. Bu reallıq beynəlxalq səviyyədə də qeyd edilir ki, dövlətinin, xalqının gələcəyini düşünən Lider hər zaman ölkəsini irəli aparacaq. Prezident İlham Əliyevin həyata keçirdiyi siyasətin əsasında da “Biz daim irəli baxmalıyıq” prinsipi dayanır. Ölkəmizin hərtərəfli inkişafı, regionda və dünya birliyində söz sahibi kimi mövqeyinin möhkəmləndirilməsi üçün bütün addımlar atılıb və bu gün də uğurla davam etdirilir. Azərbaycanın iştirakçısı və təşəbbüsçüsü olduğu layihələrin uğurlu icrası ölkələr, xalqlar arasında körpünü daha da möhkəmləndirir. Bu layihələrin regional çərçivədən çıxaraq beynəlxalq miqyas alması Azərbaycanın etibarlı tərəfdaş kimi nüfuz qazanmasını şərtləndirir. Uğurlarımızın davamlılığını təmin edən əsas amil dövlətimizin başçısı İlham Əliyevin zəngin dövlət idarəçiliyi təcrübəsi, möhkəm siyasi iradəsi, uzaqgörənliyi, qətiyyəti və cəsarəti, böyük natiqlik məharətidir. Artıq Azərbaycan iki ilə yaxındır ki, qalib ölkə kimi tarixi Zəfərimizin reallıqlarının qəbulu istiqamətində səylər göstərir. 2018-ci il prezident seçkilərindən ötən dövrün uğurlarının zirvəsində məhz ərazi bütövlüyümüzün bərpası dayanır.
Bu fikirləri AZƏRTAC-a Milli Məclisin deputatı Malik Həsənov bildirib.
Deputat qeyd edib ki, ulu öndər Heydər Əliyevin müəllifi olduğu neft strategiyasının uğurlu icrası nəticəsində qeyri-neft sektorunun inkişafı, iqtisadiyyatın şaxələndirilməsi bu mərhələdə də prioritet olub. Belə ki, sayca dördüncü olan “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı” təsdiq edilib. Regionların inkişafı ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir. Dövlət proqramlarının icra olunduğu 2004-2018-ci illər ərzində ümumi daxili məhsul 3,3 dəfə artıb. Bu müddətdə həyata keçirilmiş məqsədyönlü tədbirlər nəticəsində ölkədə 1,5 milyonu daimi olmaqla, 2 milyondan çox yeni iş yeri, 100 mindən çox müəssisə yaradılıb, işsizlik 5 faizə, yoxsulluq səviyyəsi isə 5,1 faizə enib. Dövlət proqramları çərçivəsində görülmüş genişmiqyaslı işlər regionların qarşıdakı illərdə də inkişafı üçün möhkəm zəmin yaradıb. Dördüncü Dövlət Proqramının uğurlu icrası, hədəflərə yüksək səviyyədə nail olunması son illərin sosial-iqtisadi göstəricilərində də özünü təsdiqləyir. Artıq tarixi Zəfərimizin reallıqlarına uyğun olaraq iqtisadi rayonların yeni bölgüsü ilə bağlı Fərman imzalanıb, eyni zamanda, “Azərbaycan 2030: sosial-iqtisadi inkişafa dair Milli Prioritetlər” təsdiqlənib.
Dövlətimizin başçısı İlham Əliyevin təkcə 2021-ci ildə bölgələrə 47 səfərindən 32-si işğaldan azad edilmiş ərazilərə olduğunu diqqətə çatdıran Malik Həsənov qeyd edib: “32 səfərin 7-si isə Qarabağın tacı olan Şuşa şəhərinədir. Hər bir səfər yeni sosial obyektlərin təməlinin qoyulması, yaxud açılışı ilə yadda qalır. İşğaldan azad edilmiş ərazilərimizdə bərpa və quruculuq işləri hazırkı dövrün əsas hədəfidir. Məqsəd soydaşlarımızın Böyük Qayıdışını tezliklə reallaşdırmaqdır. Son iki ilə yaxın dövrdə bu istiqamətdə görülən işlərin miqyası ölçüyəgəlməzdir. Azərbaycan xalqı torpaqlarına qovuşduğu üçün həm qürurludur, həm də onların qısa zamanda dirçəldilərək cənnət məkana çevrilməsinə, əvvəlki şöhrətlərinin özlərinə qayıtmasına səy göstərir. Azərbaycanın öz daxili imkanları hesabına görülən bərpa və quruculuq işləri uğurlarımızın təqdimatıdır”.
Deputat qeyd edib ki, 2018-ci il prezident seçkilərindən sonra islahatların anonsu verilib. Bu islahatlar qaçılmazdır, dövrün tələblərinə əsaslanır, ölkəmizin daha da qüdrətlənməsinə xidmət edir. Bu islahatların qanunverici orqanda da öz əksini tapması üçün 2020-ci il 9 fevral tarixində ölkəmizdə növbədənkənar parlament seçkiləri keçirildi. Bu kimi mühüm addımlar Azərbaycanın demokratik ölkə imicini daha da möhkəmləndirir.
“Hər günümüz Azərbaycanın tarixinə mühüm uğurlarla yazılır” söyləyən Malik Həsənov 2018-ci il aprelin 11-dən sonrakı dövrü ümumiləşdirərək deyib: “Hər zaman olduğu kimi sabitliyin qorunması, dayanıqlı iqtisadi inkişafın təmin edilməsi və bu fonda sosial müdafiənin gücləndirilməsi, ordu quruculuğu, siyasi müstəqilliyin möhkəmləndirilməsi və s. uğurlarımız 44 günlük İkinci Qarabağ müharibəsində tarixi Zəfərimizə yol açdı. Prezident, Müzəffər Ali Baş Komandan İlham Əliyev torpaqlarımızın xilaskarı, ordumuz dünyanın ən güclü ordusu, xalqımız yenilməz, məğrur xalq kimi tarixə yazıldı. Prezident İlham Əliyevin rəhbərliyi ilə Azərbaycan daha da inkişaf edəcək və möhtəşəm uğurlara imza atacaq”.
Bölmənin digər xəbərləri
