Malik Həsənov: Tariximizin hansı dövrünə nəzər salsaq, erməni vəhşiliklərinin şahidi olarıq
Bakı, 31 mart, AZƏRTAC
Tariximizin hansı dövrünə nəzər salsaq, erməni vəhşiliklərinin şahidi olarıq. Zaman-zaman azərbaycanlılara və türklərə qarşı soyqırımı, deportasiya siyasəti həyata keçirən ermənilər Azərbaycanın real faktlara, tarixi həqiqətlərə əsaslanan təbliğatı qarşısında acizliklərini açıq-aydın şəkildə büruzə verirlər. Daşnakların azərbaycanlılara qarşı törətdikləri qırğınların miqyası geniş, terror qurbanlarının sayı, günahsız insanların acı taleyi barədə məlumatlar ölçüyəgəlməzdir. Azərbaycan xalqının başına gətirilən ən dəhşətli faciələrdən biri də 1918-ci ilin mart-aprel aylarında Bakı Sovetinin mandatı altında fəaliyyət göstərən daşnak-bolşevik silahlı dəstələri tərəfindən xüsusi qəddarlıqla törədilmiş kütləvi qırğınlardır. Həmin günlərdə Bakı şəhərində, habelə Bakı quberniyasına daxil olan digər şəhər və qəzalarda on minlərlə dinc sakin məhz etnik və dini mənsubiyyətinə görə qətlə yetirilmiş, insanlar işgəncələrə məruz qalmışdır. Yaşayış məntəqələri dağıdılmış, mədəniyyət abidələri, məscid və qəbiristanlıqlar yerlə-yeksan edilmişdir. Sonrakı dövrlərdə daha da azğınlaşan erməni millətçiləri qeyri-insani əməllərini davam etdirib, Qarabağ, Zəngəzur, Naxçıvan, Şirvan, İrəvan və digər bölgələrdə kütləvi qətllər, talanlar və etnik təmizləmələr həyata keçiriblər. Bu ərazilərdə dinc əhali kütləvi surətdə qətlə yetirilmişdir. Bu tarixi faktları indiki və gələcək nəsillər bilməli, həqiqətlərin təbliğinə öz töhfələrini verməlidirlər. Bu reallıq hər zaman önə çəkilir ki, Azərbaycanın 44 günlük İkinci Qarabağ müharibəsində şanlı Zəfər qazanmasında diplomatik mübarizədə qələbəsi, münaqişənin həlli üçün möhkəm hüquqi bazanın yaradılması əsas rol oynadı. Dövlətimizin qətiyyəti, Azərbaycan Ordusunun rəşadəti sayəsində döyüş meydanında Qələbə qazanmaqla yanaşı, informasiya cəbhəsində də üstünlüyümüzü dünyaya sübut etdik. Vətən müharibəsinin yaratdığı reallıqları dünya güclərinin qəbul etmələri, sülh müqaviləsinin imzalanmasına dəstək göstərməyə hazır olduqlarını bildirmələri də Azərbaycanın bütün sahələrdə üstünlük qazanmasına, ədalət və beynəlxalq hüquq məfhumlarını öndə saxlamasına əsaslanır.
Bu fikirləri AZƏRTAC-a açıqlmasında Milli Məclisin deputatı Malik Həsənov bildirib.
Deputat qeyd edib ki, faciələrimiz Azərbaycan xalqının yaddaşına əbədi həkk olunub. Tarixin səhifələri vərəqləndikcə yeni-yeni faktlar, erməni vəhşiliyinin tükürpədən səhnələri üzə çıxır. Son vaxtlar məlumatların dəqiqləşdirilməsi istiqamətində axtarışlar genişləndirilir. Təkzibolunmaz arxiv sənədləri, soyqırımlarını təsdiqləyən çoxsaylı dəlil-sübutlar aşkarlanır. Təkcə Şamaxıda törədilən erməni cinayətlərinin miqyasına diqqət yetirmək kifayətdir. Ekspertlərin rəyinə əsasən, Şamaxının 72 kəndində ermənilər tərəfindən 7 min nəfərin, o cümlədən 1653 qadın və 965 uşağın öldürdüyü bildirilir. Bu faciənin tədqiqi məqsədilə 1918-ci il iyulun 15-də yaradılmış Fövqəladə İstintaq Komissiyası tərəfindən həmin dövrdə Şamaxı qəzasındakı 120 kəndin 86-nın erməni təcavüzünə məruz qaldığı təsdiqlənib. Ötən əsrin 90-cı illərindən etibarən yerli tədqiqatçılar da bir sıra araşdırmalar aparıblar. Onların tədqiqatı nəticəsində müəyyən edilib ki, erməni cinayətkarları Şamaxı şəhərində təqribən 14-16 min, onun 40 kənd və obasında 6-8 min nəfər qətlə yetirilib. Şamaxı qəzasından didərgin düşənlərin sayı isə 18 min nəfərdən çox olub. Özlərinə saxta tarix yazan ermənilər bu faktları saxtalaşdırmaq, həqiqətləri inkar etmək gücündə deyil. Həmişə olduğu kimi, bu gün də danışan faktlardır.
M.Həsənovun sözlərinə görə, təbliğat o zaman güclü və ictimai fikrə təsir imkanları geniş olur ki, tarixi faktlara əsaslanır. Azərbaycan həqiqətlərinin dünya ictimaiyyətinin diqqətinə çatdırılmasında Birinci vitse-prezident, Heydər Əliyev Fondunun prezidenti Mehriban xanım Əliyevanın xidmətləri böyükdür. Fondun zəngin tariximizin, ədəbiyyatımızın, milli-mənəvi dəyərlərimizin təbliğinə yönələn layihələrinin nəticələri göz önündədir. Azərbaycan tolerant, multikultural dəyərlərin inkişafına böyük töhfələr verən ölkə kimi nüfuz qazanıb. Bu gün harada yaşamasından asılı olmayaraq, hər bir azərbaycanlı qalib Azərbaycanın vətəndaşı olmaqdan qürur duyur. Tarixi Qələbəmiz ermənilərin zaman-zaman "böyük Ermənistan” dövləti yaratmaq ideyalarını puç etdi. Dövlətimizin qətiyyəti, ordumuzun gücü, qüdrəti, xalqımızın “Dəmir yumruq” kimi birliyi nəticəsində tarixi Zəfərimizə necə imza atdıqsa, bu həmrəyliyimiz, beynəlxalq hüquqa əsaslanan mövqeyimiz sayəsində işğalçı Ermənistanın cinayət əməllərinə görə beynəlxalq hüquq çərçivəsində layiq olduğu cəzanı alacağına nail olacağıq. Azərbaycan dövləti hər bir məsələnin həllində ədalət və beynəlxalq hüquq məfhumlarını öndə saxlayır.
Deputat bildirib ki, soyqırımı faktı əsl hüquqi-siyasi qiymətini yalnız Azərbaycan dövlət müstəqilliyini yenidən bərpa etdikdən, ulu öndər Heydər Əliyev xalqın təkidli tələbi ilə hakimiyyətə qayıtdıqdan sonra alıb. Ümummilli Liderin 1998-ci il martın 26-da imzaladığı “Azərbaycanlıların soyqırımı haqqında” Fərmana əsasən martın 31-i Azərbaycanlıların Soyqırımı Günü elan edilib. Bu mühüm sənəd həqiqətlərin işıq üzü görməsinə geniş imkanlar yaradıb. Artıq 24 ildir Azərbaycanlıların Soyqırımı Gününü qeyd edirik. Zaman hər bir hadisənin mahiyyətinin, başvermə səbəbinin araşdırılmasında, düzgün dəyərləndirilməsində mühüm rol oynayır. 24 ildə erməni cinayətləri ilə bağlı xeyli sayda faktlar aşkarlanıb, Ermənistana və ona havadarlıq edən dövlətlərə mesajlar ünvanlanıb. Uğurlarımızın zirvəsində dayanan tarixi Zəfərimiz Azərbaycanın gələcəyi ilə bağlı bütün məqamları özündə ehtiva edir.
Bölmənin digər xəbərləri
