Marneuli rayonunun Sadaxlı kəndindəki xəstəxanaya məşhur həkim Polux Poluxovun adı verilmişdir
Tbilisi, 3 dekabr (AZƏRTAC). Gürcüstanın Kvemo Kartli-Borçalı bölgəsinin Marneuli rayonundakı Sadaxlı kəndi Gürcüstan-Ermənistan sərhədində yerləşir və bölgənin böyük kəndlərindəndir. SOCAR-ın Gürcüstan nümayəndəliyi kənddəki xəstəxana binasını əsaslı təmir etmiş və səhiyyə ocağına burada təqribən 40 il baş həkim işləmiş Polux Poluxovun adı verilmişdir.
Bununla əlaqədar dekabrın 3-də Sadaxlıda tədbir keçirilmişdir. Azərbaycan Respublikasının Gürcüstandakı səfiri Namiq Əliyev, Kvemo Kartli-Borçalı bölgəsinin qubernatoru David Kirkitadze P.Poluxovun xatirə lövhəsini açmış, Sadaxlı kənd məktəbinin direktoru Adil Şərifov kəndin ilk ali təhsilli həkimi, 1957-ci ildən ömrünün sonunadək həmyerlilərinin sağlamlığı keşiyində dayanmış və azərbaycanlılar arasında Gürcüstanın Əməkdar Həkimi adına layiq görülmüş ilk tibb işçisi Polux Poluxovun həyat və fəaliyyəti barədə iştirakçılara ətraflı məlumat vermişdir.
Azərbaycan Respublikasının Gürcüstandakı səfiri Namiq Əliyev demişdir ki, Azərbaycan Respublikasının rəhbərliyi xaricdə yaşayan soydaşlara qayğının artırılması sahəsində ulu öndər Heydər Əliyevin müəyyənləşdirdiyi siyasi kursu uğurla davam etdirir. Bu baxımdan Gürcüstanda soydaşların yığcam məskunlaşdığı bölgələrdə həyata keçirilən tədbirlər xüsusi əhəmiyyət daşıyır ki, onlardan da birinin bu gün şahidi olduq. Sadaxlı kəndində P.Poluxov adına xəstəxananın əsaslı təmirdən sonra istifadəyə verilməsinin bu diyarda əhalinin durumunun daha da yaxşılaşdırılmasına xidmət edəcəyinə əminik.
Kvemo Kartli-Borçalı bölgəsinin qubernatoru David Kirkitadze bildirmişdir ki, SOCAR-ın Gürcüstan nümayəndəliyi ölkəmizin hər yerində olduğu kimi, bölgəmizdə də sosial sahələrin inkişafına böyük diqqət yetirir. Bu tədbir onun əyani nümunəsidir. Xəstəxana binasının keyfiyyətli təmirinə görə SOCAR-a təşəkkür edirik. Əminəm ki, xəstəxananın kollektivi budan sonra da əhalinin sağlamlığı keşiyində duracaq və xəstəxanaya bölgəmizin layiqli ziyalısı, gözəl insan Polux Poluxovun adının verilməsi onların məsuliyyətini ikiqat artıracaqdır.
SOCAR-ın Gürcüstan nümayəndəliyinin rəhbəri Mahir Məmmədov demişdir: Kollektivimiz Azərbaycan Respublikasının Prezidenti İlham Əliyevin göstərişlərinə əsasən Gürcüstanın enerji həyatı ilə yanaşı, sosial sahədə də fəaliyyətini genişləndirir. Soydaşlarımız yaşayan bölgələrdə bu istiqamətdə xeyli iş görülmüşdür. Heydər Əliyev Fondu bu sahədə həmişə nümunə göstərir. Sadaxlıda xəstəxana binası təmir edilib, lakin biz bununla işimizi bitmiş saymırıq. Gələcəkdə buraya su çəkəcək, xəstəxananın tibbi ləvazimatlarla təchiz olunması, doğum şöbəsinin təmiri və s. işləri də görəcəyik. Bununla yanaşı, bölgənin Qardabani, Bolnisi və digər rayonlarında da sosial xarakterli bir sıra layihələri həyata keçirəcəyik.
Reinteqrasiya məsələləri üzrə Gürcüstan Dövlət nazirinin müavini Yelena Tevdoradze, Gürcüstan Prezidentinin müşaviri Mübariz Qarayev, Marneuli rayonunun baş həkimi Maşuka Rexviaşvili və başqaları SOCAR-ın xeyirxahlığından məmnun olduqlarını demişlər.
Sadaxlılar daimi qayğı və diqqətə görə Azərbaycan və Gürcüstanın dövlət başçılarına təşəkkür etmişlər.
P.Poluxovun oğlu Elxan Poluxov atasının xatirəsinin əbədiləşdirilməsində xidməti olanlara ailəsi adından minnətdarlığını bildirmişdir.
Xatırladaq ki, P.Poluxov Azərbaycan Dövlət Tibb İnstitutunun müalicə-profilaktika fakültəsini 1957-ci ildə bitirmiş, doğma kəndi Sadaxlıya təyinat almış, dörd il burada sıravi həkim işləmiş, 1961-ci ildən ömrünün sonunadək - 2008-ci ilədək xəstəxananın baş həkimi vəzifəsində çalışmışdır.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
