Tursunəli Kuziyev: Azərbaycan-Özbəkistan əbədi dostluğu ortaq gələcəyə aparan yeni fəslin başlanğıcıdır
Bakı, 24 avqust, AZƏRTAC
Azərbaycan müstəqil Özbəkistanı tanıyan ilk ölkələrdən biri olub və Daşkənddə öz səfirliyini açıb. Hazırda iki dövlət arasında münasibətlər adi diplomatiya çərçivəsindən xeyli uzağa gedib. 2024-cü ildə tərəflər Müttəfiqlik münasibətləri haqqında Saziş imzalayıblar. Dünən isə prezidentlər Şavkat Mirziyoyev və İlham Əliyev Əbədi dostluq haqqında Müqavilə imzaladılar. Beləliklə, dünənki qərar müttəfiqlik münasibətlərini əvəz etmədi, əksinə, onlara yeni tarixi və simvolik ölçü qazandırdı.
Bu fikirləri AZƏRTAC-a açıqlamasında Özbəkistanda İslam Sivilizasiyası Mərkəzinin direktorunun müşaviri, Özbəkistan Respublikasının Əməkdar incəsənət xadimi Tursunəli Kuziyev deyib.
Onun sözlərinə görə, Əbədi dostluq haqqında Müqavilə xüsusilə əhəmiyyət kəsb edir. Çünki Müqavilə yeni müəssisələr, yeni yollar, yeni universitet proqramları, yeni mədəni layihələr, gənclər üçün yeni imkanlar yaratmalıdır. O, Mərkəzi Asiya ilə Qafqazı birləşdirməlidir. Nəqliyyat və ticarət marşrutlarının, qarşılıqlı investisiyaların, texnologiyaların, təhsilin, elmin, mədəniyyətin və turizmin inkişafına töhfə verməlidir. Artıq bu gün liderlər bank işi, tikinti, təhsil, turizm, dağ-mədən sənayesi, kənd təsərrüfatı və digər istiqamətlər üzrə bir sıra birgə layihələrin icrasına start veriblər. Məhz o zaman “əbədi dostluq” metafora deyil, konkret münasibətlər sisteminə çevriləcək.
Ortaq keçmişdən ortaq gələcəyə
“Hazırda Azərbaycan Prezidenti İlham Əliyev ölkənin birinci xanımı Mehriban Əliyeva ilə birlikdə Özbəkistanda dövlət səfərindədir. Onu Özbəkistan Prezidenti Şavkat Mirziyoyev xanımı Ziroatxon Mirziyoyeva ilə birlikdə səmimi qarşılayıb. Mən bu görüşlərə təkcə keçmiş mədəniyyət və idman naziri, Rəssamlıq Akademiyasının sədri, uzun illər ərzində azərbaycanlı həmkarlarımla işləmək imkanı qazanmış bir insan kimi baxmıram. Mən onlara bu dostluğun müxtəlif dövrlərdən keçərək formalaşmasının şahidi olmuş bir insan kimi baxıram və bu gün iki qardaş xalqın, onların liderlərinin dünyaya beynəlxalq münasibətlərin tamamilə fərqli bir nümunəsini göstərməsinə səmimi-qəlbdən sevinirəm”, - deyə müsahib vurğulayıb.
Tursunəli Kuziyev qeyd edib ki, münaqişələrin, etimadsızlığın və ayırıcı xətlərin həddindən artıq çox olduğu bir dünyada Özbəkistan və Azərbaycan nümunəsi tarixin xalqları bir-birindən ayırmaqla yanaşı, onları birləşdirə də bildiyini göstərir. Keçmişin yaddaşı gələcəyin təməlinə, prezident diplomatiyası xalq diplomatiyasına çevrilə bilər. Dostluq isə sadəcə bəyannamə yox, konkret əməl ola bilər. Bəlkə də elə buna görə bu müqaviləni son nöqtə kimi deyil, yeni bir fəslin başlanğıcı kimi qəbul etmək lazımdır. İki prezidentin Yeni Daşkənd ərazisində təməlini qoyduğu “Azərbaycan” parkı da bu gələcəyə simvolik bir başlanğıcdır.
“Min illik ortaq keçmiş bizim yaddaşımızdır. Bugünkü əbədi dostluq bizim seçimimizdir. Qarşıdakı onilliklər isə gələcək nəsillər qarşısında ortaq məsuliyyətimizdir. Özbəkistan və Azərbaycan dərin tarixi qohumluğa malik iki xalqın bu yaddaşı müasir tərəfdaşlığa, tərəfdaşlığı isə ortaq gələcəyə necə çevirə biləcəyinə nümunə göstərirlər. Bu iki ölkə ortaq keçmişdən ortaq bu günə, ortaq bu gündən ortaq gələcəyə necə getməyin yollarını nümayiş etdirirlər”, - deyən Əməkdar incəsənət xadimi fikrini yekunlaşdırıb.
Müxbir – Ceyhun Xəlilov
Bölmənin digər xəbərləri
