Heyrətamiz Vayt adasında bir gün - AZƏRTAC-ın əməkdaşı İngiltərənin cənubundan yazır
London-Vayt adası-London, 24 avqust, AZƏRTAC
Yarım saatdan bir qədər artıq növbədə gözlədikdən sonra, nəhayət, bu məşhur oturacaqlı kanat yoluna minirəm. Kanat yolu məni yüksəklikdən göz oxşayan mənzərənin müşayiəti ilə La-Manş boğazının sahilində yerləşən Alum Beyə endirir.
İngiltərənin cənubundakı ən məşhur adalardan biri – Vayt adasındayam. Sauthempton və Portsmut kimi şəhərlərdən adaya bərə ilə keçmək mümkündür. Böyük Britaniyada həftələrdir davam edən isti hava səbəbindən çoxsaylı yerli sakinlər ölkənin sahilyanı bölgələrinə, kəndlərinə və adalarına üz tuturlar. Belə isti yay isə Britaniyada uzun illərdir müşahidə olunmurdu.
Bu səbəbdən Vayt adası da ilin ən gur turizm mövsümlərindən birini yaşayır. Adanın cənub-qərbində yerləşən oturacaqlı kanat yolunda 30-40 dəqiqə növbə gözləmək bir qədər yorucu olsa da, aşağı enərkən uzaqdan görünən məşhur “The Needles” mayakının mənzərəsi buna dəyir. Mayakı daha yaxından görmək üçün sahildən təşkil olunan qayıq turlarından birinə qoşuluram. Təxminən 15 dəqiqə davam edən səfər zamanı qayıq sərnişinləri düz mayakın yaxınlığına qədər aparır. Dənizin ortasında, qayalıqların sonunda ucalan mayakı yaxından görmək adanın ən yaddaqalan təcrübələrindən biridir.
Təxminən 140 min əhalisi olan Vayt adasını hər il milyonlarla turist ziyarət edir. Adanın ən çox tanınan mənzərələrindən biri də məhz The Needles qayalıqları, mayak və Alum Bey sahilləridir.
Qayıq turundan sonra yenidən 30-40 dəqiqə növbədə gözləyir və kanat yolu ilə yuxarıya - gəldiyim yerə qayıdıram.
Adanın digər məşhur yerlərindən biri Kompton Beydir. Burada su çəkildiyi zaman “Hanover Point” ərazisində qayalarda daşlaşmış, təxminən 130 milyon il əvvələ aid dinozavr ayaq izlərini görmək mümkündür. Düzdür, bundan əvvəl Vayt adasında bir neçə dəfə olsam da, həmin izləri özüm görməmişəm. Onları tapmaq üçün bir qədər axtarmaq və ən əsası, suyun çəkildiyi vaxtı düzgün seçmək lazımdır.
Növbəti dayanacağımız adanın ən füsunkar guşələrindən biri olan Şanklinin qədim kəndidir. Nağılları xatırladan görünüşü və özünəməxsus ab-havası ilə seçilən kəndin ən diqqətçəkən məkanlarından biri məşhur çəhrayı kənd evidir. Şanklinin rəmzlərindən birinə çevrilən bu ev həm də ən çox fotoşəkil çəkilən yerlərdəndir. Hazırda burada kafe fəaliyyət göstərir. Hava olduqca isti olduğundan Şanklin çimərliyinə də enirik. Böyük Britaniyada bundan əvvəl də bir neçə dəfə dənizə girməyə çalışsam da, su mənə həmişə çox soyuq gəlirdi. Bu dəfə isə havanın istiliyindən dənizin soyuqluğu demək olar ki, hiss olunmur.
Əlbəttə, Vayt adasına gəlib Kraliça Viktoriyanın və şahzadə Albertin çox sevdiyi dənizkənarı iqamətgahı olan Osborn Evini görmədən qayıtmaq olmaz. Buraya gəlməzdən əvvəl kompleksin bu qədər böyük olduğunu təsəvvür etmirdim. Ərazidə rahatlıqla üç-dörd saat vaxt keçirmək mümkündür. Kraliça Viktoriya və şahzadə Albert Osborn Evini ailələri üçün şəhər həyatından uzaqda, özlərinə məxsus sakit bir məkan yaratmaq məqsədilə alıb yenidən qurmuşdular. Osborn Evi 1845-1851-ci illərdə Kraliça Viktoriya və şahzadə Albert üçün yay iqamətgahı və şəhər həyatından uzaqlaşa biləcəkləri məkan kimi inşa olunub. Şahzadə Albert iqamətgahın dizaynında yaxından iştirak edib və bina İtaliya İntibah dövrü saraylarının memarlıq üslubunda yaradılıb.
Osborn Evi Kraliça Viktoriyanın həyatında xüsusi yer tutub. O, ömrünün son illərində də burada çox vaxt keçirib və 1901-ci ildə 81 yaşında məhz Osborn Evində vəfat edib.
İqamətgahı gəzdikdən sonra isə artıq Londona qayıtmaq vaxtıdır.
Gözəl çimərlikləri, tarixi kəndləri, möhtəşəm sahil mənzərələri və zəngin kral tarixi ilə Vayt adası Böyük Britaniyanın ən maraqlı turizm istiqamətlərindən biridir. Yolunuz İngiltərəyə düşərsə, bu adanı səyahət siyahınıza əlavə etməyə dəyər.
Bölmənin digər xəbərləri
