Mart soyqırımı xalqımızın qan yaddaşında əbədi iz salıb
Bakı, 31 mart, AZƏRTAC
Azərbaycanlıların Soyqırımı Günü münasibətilə Azərbaycan Texniki Universitetində anma mərasimi keçirilib.
Əvvəlcə soyqırımı qurbanlarının xatirəsi bir dəqiqəlik sükutla yad olunub.
Universitetdən AZƏRTAC-a bildiriblər ki, tədbirdə AzTU-nun rektoru, professor Havar Məmmədov zaman-zaman xalqımıza qarşı törədilmiş soyqırımı hadisələrindən danışıb.
Rektor bildirib ki, tarixi şərait səbəbindən ötən iki əsr ərzində baş verən hadisələrə, törədilmiş faciələrə obyektiv qiymət vermək mümkün olmayıb. Yalnız müstəqillik dövründə, 1998-ci il martın 26-da ümummilli lider Heydər Əliyevin “Azərbaycanlıların soyqırımı haqqında” Fərmanı ilə martın 31-i Azərbaycanlıların Soyqırımı Günü elan edilib və erməni millətçilərinin cinayətkar əməllərinə hüquqi-siyasi qiymət verilib.
Universitetin tarix kafedrasının müdiri, professor Şikar Qasımov tarixi faktları söyləyərək bildirib ki, XX əsrin əvvəllərində ermənilər ilk dəfə Azərbaycanın torpaqlarından yerli əhalini sıxışdırıb çıxarmağa başlayıblar. Bu məqsədlə ermənilərin Azərbaycanda fəaliyyət göstərən terror təşkilatları 1905-ci ildə Bakıda, İrəvanda, Zəngəzurda, Qarabağda və digər yerlərdə kütləvi qırğınlar törədib.
Digər çıxış edənlər də bildiriblər ki, gənclərin vəzifəsi xalqımıza qarşı həyata keçirilən soyqırımı haqqında indiki və gələcək nəsillərdə milli yaddaş formalaşdırmaq, bu faciələrə bütün dünyada siyasi və hüquqi qiymət verilməsinə nail olmaqdır. Bu qırğın xalqımızın tarixindən silinməyəcək.
Bölmənin digər xəbərləri
